दोहा– कुवेतबाट अल जजिरा एअरवेजको पहिलो जहाज उडेको छ । लामो समयदेखि कुवेत सरकारले दिएको आममाफीको कारण आफ्नो आवास छाडेर सेल्टरमा बसेका २९९१ जना नेपालीहरु मध्ये दुई जहाजमा ११ जना बालबालिकासहित ३६६ जना नेपाली महिलाहरु छन् ।
पहिलो जहाज कुवेतको समयअनुसार बिहान ३ बजे भनिए पनि ढिलो गरी ४ः२५ मिनेट जाँदा उडेको हो भने दोस्रो जहाज पनि केहि ढिलो गरी ६ बजे उडान गर्ने तयारीमा रहेको छ । अहिले दोस्रो जहाजको पनि बोर्डिङ भइरहेको छ ।
आममाफीमा सहभागी भएका र घरफिर्ती केन्द्रमा रहेका केही गरी २ हजार ९९१ जनाको सूची कुवेतस्थित नेपाली दूताबासले परराष्ट्रलाई बुझाएको थियो । यसरी फर्काइने नेपालीहरुको निःशुल्क रुपमा स्वास्थ परीक्षण गरी उडानको पनि निःशुल्क व्यवस्था गरिएको कुवेत सरकारले जनाएको छ ।
उनीहरु यतिबेला कुवेत सरकारले निर्माण गरेको सेल्टरमा बसिरहेका छन् । कुवेतले नै खाद्यान्नलगायत व्यवस्था गरिरहेको छ । नेपालले अनुमति दिएमा कुवेत यसअघि नै पनि आममाफीमा सहभागीलाई पठाइदिने भनेको थियो । विविध कारणले घर फर्कनै पर्ने करिव ४ हजार नेपालीहरुले दूताबासमा फारम भरेको दूताबास स्रोतले जनाएको छ ।
अवैधानिक हैसियतमा रहेका उनीहरुलाई कुवेत सरकारले गत अप्रिल २६ देखि ३० सम्म स्वदेश फर्किन सक्ने सूचना जारी गरेपछि आफूहरुले गर्दै आएको काम र क्याम्प छाडेर स्वदेश फर्किने प्रक्रियामा सहभागी भएका थिए ।
