काठमाडौं– नेपाल उड्डयन प्राधिकरणले कुवेतमा आममाफी पाएका नेपालीलाई बिहीबार ल्याउने जनाएको छ । कुवेतबाट बुधबार साँझ ४ बजे नेपाली लिएर उडान गर्ने भनिए पनि विमानस्थलमा नेपाली सेनाले साँझ ६ बजेपछि यात्रु लिन नसक्ने बताएपछि बिहीबार मात्र नेपालीलाई ल्याइने प्राधिकरणले जनाएको हो ।
कोभिड–१९ संकट व्यवस्थापन समिति (सिसिएमसी) ले कुवेतबाट नेपाली लिएर उडान गर्नका लागि मंगलबार अनुमति दिएसँगै बुधवार कुवेत सरकारले आफ्नै खर्चमा विमानमार्फत आममाफी पाएका ३ सय महिलालाई नेपाल ल्याउने बताएको थियो । तर, सेनाले साँझको समय यात्रु लिन नसकिने बताएपछि रद्ध भए पनि बिहीबारचाहिँ जसरी भए पनि नेपाली लिएर आउने निश्चित भएको कुवेतस्थित नेपाली दूताबासले उडान तालिका नै सार्वजनिक गरेको छ ।
दूताबासका अनुसार बिहीबार बिहान ११ बजेर ३० मिनेटमा एउटा विमान आइपुग्नेछ भने १२ बजेर ३० मिनेटमा अर्को विमान नेपाल आइपुग्नेछ । आममाफीमा सहभागी भएका र घरफिर्ती केन्द्रमा रहेका केही गरी २ हजार ९९१ जनाको सूची परराष्ट्रलाई बुझाएको कुवेतस्थित नेपाली दूताबासले जनाएको छ । यसरी फर्काइने नेपालीहरुको निःशुल्क रुपमा स्वास्थ परीक्षण हुनेछ भने उडानको पनि निःशुल्क व्यवस्था गरिएको कुवेत सरकारले जनाएको छ ।
कुवेतमा आममाफी पाएका र डिपोर्टटेसन सेन्टरमा रहेकालाई नेपाल पठाइदिने दूताबासले बताएको छ । दूताबासका अनुसार कुवेतले आममाफी पाएका नेपालीलाई अस्थायी क्याम्प र डिपोर्टटेसन सेन्टरमा राखेकालाई आफ्नै खर्चमा दैनिक दुई वटा चार्टर्ड विमानमार्फत नेपाल पठाउने जनाइसकेको छ । हाल अस्थायी क्याम्प र डिपोर्टटेसन सेन्टरमा २ हजार ९ सय ९१ जना रहेका छन् । जसमा १ हजार ६ सय ८८ पुरुष र १ हजार ३ सय ३ जना महिला रहेको दूताबासले जनाएको छ ।
उनीहरु यतिबेला कुवेत सरकारले निर्माण गरेको सेल्टरमा बसिरहेका छन् । कुवेतले नै खाद्यान्नलगायत व्यवस्था गरिरहेको छ । नेपालले अनुमति दिएमा कुवेत यसअघि नै पनि आममाफीमा सहभागीलाई पठाइदिने भनेको थियो । विविध कारणले घर फर्कनै पर्ने करिब ४ हजार नेपालीहरुले दूताबासमा फारम भरेका छन् ।
अवैधानिक हैसियतमा रहेका उनीहरुलाई कुवेत सरकारले गत २६ अप्रिलदेखि ३० सम्म स्वदेश फर्किन सक्ने सूचना जारी गरेपछि काम र क्याम्प छाडेर स्वदेश फर्किने प्रक्रियामा सहभागी भएका थिए ।
दूताबासका अनुसार कुवेतले भिसा नवीकरण नगरेका र रोजगारदाता परिवर्तन गरेर काम गर्दा जरिवानामा परेका नेपालीसहित विभिन्न देशका विदेशी नागरिकलाई आममाफी दिएको छ । कुवेतले अन्य देशका नागरिकलाई आफ्नो देश फर्काइकेको भए पनि आममाफी पाएका नेपालीलाई भने अप्रिलदेखि सेल्टरमा राख्दै आएको थियो । अहिले आममाफी पाएर सेल्टरमा बसेका नेपालीको खाद्यान्न लगायतको सबै व्यवस्था कुवेत सरकारले गरेको दूताबासले बताएको छ ।
बुधबार विहान कुवेतको विमानस्थल पुगेका नेपाली भने प्राधिकरणले जनाएभन्दा ठीकविपरीत बताउँछन् । उनीहरुका अनुसार स्वास्थ्य सम्वन्धि अवरोध भयो भन्दै उडान रद्ध गरिएको थियो । यद्यपि के कारणले बुधबारको उडान रद्ध हुन गयो भन्ने विषयमा दूताबासले स्पष्ट जानकारी दिएको छेन । दूतावासका अनुसार प्राथमिकताका आधारमा फकर्नेहरु बाहेक ४ हजार नेपालीले राजदूताबासमा फर्कनका लागि फाराम भरेका छन् ।
०००
