दोहा– कतारमा कोरोना भाइरस संक्रमणबाट अहिलेसम्म चार नेपालीको मृत्यु भएको छ । कतारस्थित नेपाली दूताबासका अनुसार मृत्यु हुने ४ मध्ये २ जनाको अन्य रोग देखिए पनि मृत्युको प्रमुख कारण कोरोना नै भएको जनाएको छ ।
नेपालमा लक डाउन भएपछि कतारमा ४ जनाको कोरोनाको कारण मृत्यु भएको र अन्य ३६ जनाको विभिन्न कारणले मृत्यु भएको कतारस्थित नेपाली दूतावासका द्वितीय सचिब प्रवीण भट्टराईले जानकारी दिएका छन् । उनका अनुसार हालसम्म ९ वटा शव कतारमै दाहसंस्कार गर्न परिवारबाट सहमति प्राप्त भएको र ३ जनाको दाहसंस्कार सम्पन्न भइसकेको छ ।
कतारमा कोरानाबाट संक्रमण हुनेको संख्या ७० हजार १ सय ५८ पुगेको छ । अहिलेसम्म ४५ हजार ९ सय ३५ जना उपचारपछि निको भएर घर फर्किएका छन् भने कोरोनाको कारण अहिलेसम्म ५७ जनाले ज्यान गुमाईसकेका छन् ।
यता, गैरआवासीय नेपाली संघ राष्ट्रिय समन्वय परिषद कतारद्वारा गठित कोरोना उद्धार तथा राहत बितरण समितिले कतारको गृह मन्त्रालयमार्फत कतार च्यारिटीबाट प्राप्त खाद्यान्न सोह्रौँ चरणमा कतारको विभिन्न ठाउँमा रहेका र खाद्यान्नको समस्यामा रहेका ५ सय ६ जना पीडित नेपाली श्रमिकहरूलाई खाद्यान्न वितरण गरिएको गैरआवासीय नेपाली संघ कतारका प्रथम उपाध्यक्ष एवं उद्धार तथा राहत समितिका संयोजक उत्तम गुरुङले जानकारी दिएका छन् ।
