दोहा– साउदी अरबबाट स्वदेश फर्किन पाउँ भन्दै जुन पाँचसम्म १० हजार भन्दाबढी नेपालीहरुले साउदीस्थित नेपाली दूताबास रियाद र महाबाणिज्य दूताबास जेद्धामा निवेदन परेको साउदीका लागि नेपाली राजदूत डा. महेन्द्रप्रसाद सिंह राजपुतले जानकारी दिएका छन् ।
जसमा ६ हजार ५ सय पीडितहरु रोजगारी गुमाएका, बहिर्गमन भिसा लिएर बसेका, भिजिट भिसामा आएका, नेपालमा आफन्त गुमाएकाहरु रहेको दूताबासले जनाएको छ ।
दूताबासले दिएको जानकारी अनुसार जुन पाँचसम्म कोरोनाबाट संक्रमित हुने नेपालीहरुको संख्या १३ सय ६४ पुगेको छ भने अहिलेसम्म कोरोनाबाट ९ जना नेपाली नागरिकको मृत्यु भइसकेको जनाएको छ ।
धेरै संक्रमित नेपालीहरु पनि निको भइसकेको जनाउँदै दूताबासले पछिल्लो समयमा सम्बन्धित निकायबाट कुनै पनि जानकारी नआएको र जानकारी लिने कार्य भइरहेको जनाएको छ ।
गैरआवासीय नेपाली संघ साउदीले विपदको घडीमा साउदी अरबमा क्रियाशील नेपाली संघसंस्थाहरु, सामाजिक अगुवाहरु, बुद्धिजीवी वर्गलगायत सबैसँग संयुक्त रूपमा हातेमालो गर्दै श्रमजीवी नेपालीबीच गठित सम्पूर्ण संघसंस्थाहरु एकजुट भएर संयुक्त रूपमा हातेमालो गरिरहेको एनआरएनए मध्यपूर्व उपसंयोजक राजेन्द्र अर्याल जानकारी दिएका छन् ।
एनआरएनए साउदीले साउदीको विभिन्न स्थानमा कोरोनाबाट प्रभावित नेपालीहरुको सहयोगार्थ नेपाली दूताबास रियाद तथा महाबाणिज्य दूताबास जेद्धासँग समन्वय गर्दै नेपाली कामदारहरुको जीवन रक्षा, स्वदेश फिर्ती साथै तत्कालका लागि पीडितहरुलाई राहत स्वरुप खाद्यान्न सहयोग गर्दै आएको छैटौँ हप्ता पार गरिसकेको उनले बताए ।
एनआरएनए साउदीका अनुसार यो साता पीडामा परेका १२ जना महिलासहित थप ३१ जना पीडितलाई खाद्यान्न उपलब्ध हराएको जनाउँदै हालसम्म एनआरएनए साउदी समक्ष आएका ३१२ जना पीडितहरुलाई दूताबाससँग समन्वय तत्कालका लागि खाद्यान्न वितरण गरेको छ ।
साथै अहिलेसम्म ३ सय भन्दाबढी पीडितहरुको गुनासो आएको र नेपाली दूताबास रियाद र महाबाणिज्य दूताबाससँग समन्वय गरी दूताबासकै पहलमा समस्या समाधान गरिएको एनआरएनए साउदीले जनाएको छ ।
नेपाल सरकारले समस्यामा परेका आङ्खना नागरिकलाई स्वदेश फर्काउने तयारी गरिरहेको भए तापनि साउदी अरबका लागि उडानको मिति नतोकिएका कारण अझै अन्योलता रहेको छ ।
यसैबीच, साउदीमा रहेका अवैधानिक नेपालीलाई तत्काल सम्पर्कमा आउन महावाणिज्य दूताबासले आग्रह गरेको छ । साउदीको मक्का पश्चिम क्षेत्रमा अवैधानिक भएर बसेका नेपालीहरुलाई सम्पर्कमा आउन साउदीस्थित महावाणिज्य दूताबास जेद्धाले आग्रह गरेको हो ।
अवैधानिक भएका तथा कम्पनीले अकामा नबनाइदिएका वा नवीकरण नगरिदिएका ताबुक, मक्का, मदिना, जिजान, अल्बाह, असिर रिजन र नजरानमा बस्ने नेपालीलाई सम्पर्कमा आउन एक सूचना जारी गर्दै महाबाणिज्य दूताबासले आग्रह गरेको छ ।
कोरोनाको कारणले स्वदेश फर्कनैपर्ने अवस्था भएका नेपाली कामदारलाई आवश्यक विवरणसहित जेद्दास्थित महावाणिज्य दूताबास सम्पर्क गर्न अनुरोध गरिएको छ ।
यस्ता समस्यामा परेका नेपाली कामदारहरुले आफ्नो नाम, मोबाइल नम्बर, कम्पनीको नाम, स्थान र सम्पर्क नम्बर विवरणमा उल्लेख गर्नुपर्ने हुन्छ । यस्तै राहदानीको फोटोकपी (फोटोपेज मात्रै), अकामा बनेको भएमा अकामाको फोटोकपी र अकामा नबनेको भएमा राहदानीको बोर्डर नम्बर भएको पेजको फोटोकपी पनि पेस गर्न अनुरोध गरिएको महाबाणिज्य दूताबासले जनाएको छ ।
-1745656903.jpeg)