दोहा– साउदी सरकारले लकडाउन खुकुलो बनाउने तयारी गरेको छ । कोरोनाको संक्रमण रोकथाम र नियन्त्रणका लागि दुई महिनादेखि लगाइएको कर्फ्यु र लकडाउलाई ईद पर्व सकिएपछि खुकुलो बनाउने तयारी गरेको हो ।
बताइए अनुसार विभिन्न ३ चरणमा विभाजन गरी लकडाउन खुकुलो बनाउँदै लैजाने सरकारले निणर्य गरेको जनाएको छ । साउदी प्रेस एजेन्सीका अनुसार पहिलो चरण २८ मेदेखि ३० सम्ममा मक्का बाहेकका क्षेत्र र प्रान्तहरूबीचको आवागमनलाई बिहान ६ बजेदेखि अपराह्न ३ बजेसम्म खुल्ला गरिएको छ र बा“की समय भने लकडाउन हुनेछ ।
यसअघिको लकडाउनमा प्रान्त र क्षेत्रहरूबीचको आवागमन बन्द गरिएको थियो । यस अवधिमा खुद्रा तथा होलसेल पसलहरू तथा मलहरू पुनः संचालनमा आउने साउदीको आन्तरिक मामिला मन्त्रालयले जनाएको छ ।
त्यस्तै सामाजिक दूरी कायम गर्नुपर्ने ब्युटिपार्लर, सैलुन, स्पोर्ट क्लब, हेल्थ क्लब, मनोरञ्जनका क्षेत्र, सिनेमा हल भने बन्द रहने छन् । दोस्रो चरणका रूपमा निर्धारण गरिएको मे ३१ देखि जुन २० मा मक्काबाहेका क्षेत्र र प्रान्तहरूबीचको आवागमनलाई बिहान ६ बजेदेखि साँझ ८ बजेसम्म खुला गरिएको छ । साथै, कोराना संक्रमण नियन्त्रणसम्बन्धी सबै गाइडलाइनहरूलाई पूर्णपालना गर्ने गरी मन्त्रालय, सरकारी निकायहरू र निजी क्षेत्रका कम्पनीहरूमा कर्मचारीको उपस्थितिलाई पनि अनुमति दिइएको छ ।
सूचना अनुसार क्षेत्र र प्रान्तबीच चल्ने सार्वजनिक यातायातका साधनहरू भने संचालनमा आउने छैनन् । तर अन्तर्राष्ट्रिय उडानहरू भने अर्को सूचना नभएसम्मका लागि स्थगित नै रहने बुझिएको छ ।
यसैगरी यस अवधिमा रेस्टुरेन्ट र फुड तथा बेभरेज क्याफेहरू खुल्ने भएका छन् । दोस्रो चरणमा पनि सामाजिक दूरी कायम गर्नुपर्ने ब्युटिपार्लर, सैलुन, स्पोर्ट क्लब, हेल्थ क्लब, मनोरञ्जनका क्षेत्र, सिनेमा हललाई खोल्ने अनुमति दिइने छैन । तेस्रो र अन्तिम चरणका रूपमा विभाजन गरिएको २१ जुनपछिको अवधिमा सरकारले आर्थिक गतिविधिका सबै क्षेत्रहरू खुल्ला गर्ने र लकडाउनभन्दा अगाडिको ‘सामान्य’ अवस्थामा मुलुकलाई लैजाने योजना बनाएको साउदी प्रेसले जनाएको छ ।
कुवेतमा एक नेपालीको मृत्यु
यसैबीच, रोजगारीका लागि कुवेत पुगेका एक नेपालीको मृत्यु भएको छ । कुवेतस्थित अल समस्या क्लिनिङ कम्पनीमा कार्यरत स्याङजाका ३७ वर्षीय अर्जुन गुरुङको मृत्यु भएको हो ।
गुरुङलाई स्वास्थ्यमा अचानक समस्या देखिएपछि स्थानीय आदान अस्पतालमा पु¥याइएको थियो । उनको उपचारकै क्रममा मृत्यु भएको समाचार छ । अस्पतालले दिएको जानकारी अनुसार रक्तसंचारमा गिरावट, श्वासप्रश्वास प्रणाली विफल हुनु र मुटुको मांशपेशी बन्द भएको कारण उनको मृत्यु भएको जनाइएको छ ।
कम्पनी र परिवारसँग समन्वय गरेर मृतकको कानुनी प्रक्रिया थालिएको कुवेतस्थित दूताबासले जनाएको छ ।
