दोहा– गैरआवासीय नेपाली संघ राष्ट्रिय समन्वय परिषद् कतारद्वारा गठित उद्धार तथा राहत वितरण समितिले नोबेल कोरोना भाइरस (कोभिड–१९) पीडित नेपाली श्रमिकलाई खाद्यान्न सामग्री वितरणमा तीव्रता दिइरहेको छ । समितिले कतार सरकार गृह मन्त्रालयमार्फत कतार च्यारिटीबाट प्राप्त खाद्यान्न सामग्री वितरण कार्यलाई तीव्रता दिएको राहत समितिका संयोजक उत्तम गुरुङले बताए ।
गैरआवासीय नेपाली संघ कतारका प्रथम उपाध्यक्ष एवं राहत समितिका गुरुङले समितिले १५ सय नेपाली श्रमिकलाई खाद्यान्न सामग्री वितरण गरिएको जानकारी दिँदै कतार च्यारिटीबाट प्राप्त खाद्यान्न सामग्री वितरण कार्यलाई तीव्र्रता दिइरहेको बताएका छन् । उनले नवाँै चरणमा कतारको सनैया स्ट्रिट नम्बर ५, १०, ११, १५, २३, ३८, लक्ता रयान, अम सलाल मोहम्मद, मैजार, अल्खोर, अल रयान, मदिना खलिफा, मार्खिया, न्यू सलता, नज्मा, अल खिसा, एन खालिद, मतार कदिम, वल्र्ड अल घानिम, तरबार गेट, मुग्लिना, अल तुममा, अल साद, वाक्रा, दुहिल र मुराकालगायत विभिन्न ठाउँमा रहेका २ सय जना कोभिड–१९ पीडित नेपाली श्रमिकहरूलाई १५ दिनसम्म पुग्ने खाद्यान्न वितरण गरिएको जानकारी दिएका छन् ।
कोभिड–१९ का कारण पीडित नेपाली श्रमिकहरू धेरै भए पनि अहिलेसम्म १५ सय १५ जना नेपाली श्रमिकहरूलाई राहत स्वरूप खाद्यान्न वितरण गरिसकिएको तथा बाँकी पीडितहरूको नामावली संकलन कार्य भइरहेको संयोजक गुरुङले बताए । गैरआवासीय नेपाली संघ कतारका महासचिव पदम गिरीले कोरोना संकटको कारणले कतारमा रहेका नेपालीहरूलाई खानासम्बन्धी कुनै समस्या भए संघले उपलब्ध गराएको टेलिफोन नम्बर वा ई–मेलमार्फत पनि सम्पर्क गर्न सकिने बताए ।
स्वास्थ्य मन्त्रालयले कतारमा पछिल्लो २४ घन्टामा ३ हजार ९ सय २७ जनामा गरिएको परीक्षणमा थप एक हजार सात सय ४२ जनामा कोभिड–१९ को संक्रमण, एक हजार चार सय ८१ जना निको भएर फर्किएको र दुई जनाको मृत्यु भएको जनाएको छ । यससँगै कतारमा भाइरस संक्रमितको संख्या ४७ हजार दुई सय सात पुगेको छ । मन्त्रालयका अनुसार अहिलेसम्म ११ हजार आठ सय ४४ जना उपचारपछि निको भएर घर फर्किएका छन् भने हालसम्म २८ जनाको मृत्यु भइसकेको छ ।
