दोहा– कतार सरकारले यहाँ रहेका नेपाली कामदारका लागि १ करोड ६० लाख रूपैया“ बराबरको खाद्यान्न सहयोग गरेको छ । गैरआवासीय नेपाली संघ (एनआरएनए) कतारका अध्यक्ष मोहम्मद मुक्तदाले कोरोनाको कारण रोजगारी गुमाएका कामदारको सहयोगार्थ कतार सरकारले १ करोड ६० लाख रूपैयाँ बराबरको खाद्यान्न सहयोग उपलब्ध गराएको बताए ।
यसैगरी कतारस्थित नेपाली दूताबासका द्वितीय सचिव प्रवीण भट्टराईका अनुसार गैरआवासीय नेपाली संघ कतारले कतारमा समस्यामा परेका नेपालीहरूलाई खाद्यान्न वितरण गर्ने भएको छ । अहिलेसम्म नेपाली दूताबास, गैरआवासीय नेपाली संघ तथा अन्य संघसंस्था तथा व्यक्तिहरूले समेत सहयोग वितरण गर्दै आएकोमा राहत वितरणमा हुन सक्ने दोहोरोपन हटाउन त्यसको जिम्मा एनआरएनएलाई दिइएको जानकारी दिएका छन् ।
उनका अनुसार राहत वितरण प्रक्रियामा दूताबासले संरक्षक र सहजकर्ताको भूमिका निभाउने गरी शनिबारदेखि राहत कार्यक्रम नसकिँदासम्म वितरणको सम्पूर्ण जिम्मा एनआरएनएलाई दिएको हो । यसले राहत वितरण प्रक्रियालाई एकीकृत रूपमा छरितो तथा प्रभावकारी बनाउने अपेक्षा गरिएको सचिव भट्टराईले बताए ।
यस्तै कतारमा रहेका नेपाली संघसंस्था तथा इच्छुक व्यक्तिहरूले राहत खाद्य सामग्रीका लागि गैरआवासीय नेपाली संघ कतारलाई सहयोग गरिदिन तथा राहत वितरणका लागि स्वयंसेवीहरू उपलब्ध गराइदिन पनि आग्रह गरिएको उनले बताए ।
राहत खाद्य सामग्री भण्डारणका लागि दूताबासले आवश्यक सहयोग गर्ने उनले बताएका छन् । भट्टराईका अनुसार राहत सामग्री वितरणका लागि समन्वय गर्न दूताबासको तर्फबाट एक जना प्रतिनिधिलाई समावेश गरिनेछ ।
यस्तै, एनआरएनए कतारले राहत खाद्य सामग्री संकलन तथा वितरणको विवरण सार्वजनिक गर्ने बताइएको छ । राहत खाद्य सामग्री प्राप्त गर्ने व्यक्ति तथा उनीहरूलाई परेको समस्याको जानकारीसहितको नामावली दूताबासलाई पनि उपलब्ध गराउनु पर्ने भनिएको छ ।
यसरी प्राप्त समस्यासहितको सूचीको आधारमा दूताबासले नेपालीहरूलाई परेका विभिन्न समस्याका समाधानका लागि नेपाल र कतार सरकारका सम्बन्धित निकाय तथा रोजगारदाता वा अन्य सम्बन्धित पक्षहरूसँग समन्वय गर्ने सचिव भट्टराईले बताए ।
यता, गैरआवासीय नेपाली संघ राष्ट्रिय समन्वय परिषद् कतारद्वारा गठित उद्दार तथा राहत वितरण समितिद्वारा एनसिसी कतारको समन्वय गर्दै कतार च्यारिटीमार्फत कतारमा कोरोनाबाट पीडित नेपालीहरूलाई सातौँ चरणसम्मको राहत वितरण गरिसकेको एनआरएनए कतारका प्रथम उपाध्यक्ष एवं उद्धार तथा राहत समितिका संयोजक उत्तम गुरुङले जानकारी दिएका छन् ।
-1745656903.jpeg)