काठमाडौं– यही जेठमा हुनुपर्ने रोजगार अनुमति प्रणालीअन्तर्गत कोरियाली भाषा परीक्षा कोरोना भाइरसका कारण रोकिएको छ । परीक्षा रोकिएपनि दक्षिण कोरिया सरकारले भाषा परीक्षा तयारी गरिरहेका युवालाई डिजिटल प्रविधिमार्फत परीक्षामा सामेल गराई कोरिया ल्याउन तयार भएको जनाएको छ ।
नेपालस्थित इपिएस कोरियाका एचआरडी प्रमुख पार्क ही सुङले रोजगार विभागमा भएको बैठकमा उक्त कुरा बताएका हुन् । उनका अनुसार पूर्वनिर्धारित तालिकानुसार जुन महिनामा हुनुपर्ने कोरियाली भाषा परीक्षा कोरोना भाइरसका कारण केही पछि सरे पनि डिजिटल प्रविधिमार्फत भाषा परीक्षा लिन सकिनेछ । इपिएस प्रणालीअन्तर्गत १६ देशका विदेशीहरू रोजगारीका लागि कोरियाली भाषा परीक्षा दिई कोरियामा श्रम गर्छन् । ती १६ देशमध्ये नेपाल पनि एक हो । कोरियामा ४० हजारभन्दा बढी नेपाली इपिएसअन्तर्गत प्रत्यक्ष रोजगारी गरिरहेका छन् ।
हरेक वर्ष लगभग सात हजार नेपाली युवाले कोरियामा प्रत्यक्षरूपमा रोजगारी पाउँदै आइरहेका छन् । यस वर्ष पनि सात हजार दरबन्दी नेपालका लागि छुट्याइएको थियो । कोरोना भाइरस महामारी रोक्न नेपाल सरकारले गरेको लकडाउनका कारण परीक्षा कहिले हुने भन्ने अनिश्चितता थियो । यसैबीच कोरिया सरकारको पक्षबाट यो निर्णय आएको हो ।
कोरोना महामारीपछि बन्द भएका कोरियाका विद्यालयहरू समेत सञ्चालनमा आएका छन् । कोरोना भाइरस केही साम्य हुन थालेपछि पहिलो चरणअन्तर्गत माध्यमिक तहका पठनपाठन बुधबारदेखि सञ्चालन भएका हुन् । पूर्वप्राथमिकदेखि अन्य तहका विद्यालय भने जुन ८ देखि सञ्चालन गरिने शिक्षा मन्त्रालयले बताएको छ ।
गत फेबु्ररीदेखि कोरोना भाइरसले महामारीको रूप लिएपछि सम्पूर्ण तहका विद्यालय बन्द भएका थिए । पुनः सञ्चालनमा आएका हरेक विद्यालयमा शिक्षक तथा विद्यार्थीको स्वास्थ्य निगरानी तथा सेल्फ आइसोलेसनलगायत कुरालाई बढी जोड दिइने बताइएको छ । ती विद्यालयमा शिक्षा मन्त्रालयले सात चेक प्वाइन्टसमेत उपलब्ध गराएको छ ।
विद्यालय खुलेर पठनपाठन शुरु भएपनि कोरियामा कोरोना भाइरस भने पूर्णरूपमा नियन्त्रणमा आइसकेको छैन । दुई हप्ताअघि सोल नजिकैको इथेवन बजारको एक रात्रि क्लबबाट सामूहिक संक्रमणपछि कोरियामा संक्रमण पुनः थपिएको छ ।
बुधबार यतामात्र ३२ नया“ संक्रमित थपिएएका छन् । यसस“गै कोरियामा कूल संक्रमितको ११ हजार ११० पुगेका छन् । त्यस्तै ९ हजारभन्दा धेरै निको भई घर फर्किसकेका छन् । कोरियामा अहिलेसम्म कोरोना संक्रमणबाट २६३ जनाको मृत्यु भएको छ । दक्षिण कोरिया यस्तो मुलुक बनेको छ, विश्वले कोरोना रोकथाम तथा नियन्त्रण गर्न देश लकडाउन गरेपनि कोरियाले खाशै लकडाउन गरेन किनकि, कोरियाली जनता आफैँले कोरोनाविरुद्ध जित हासिल गरेको छ ।
