काठमाडौं– वैदेशिक रोजगारका क्रममा जोखिममा रहेकाहरूको तथ्यांक संकलन भइरहेको वैदेशिक रोजगार विभागका महानिर्देशक कुमार दहालले बताएका छन् । कोभिड १९ का कारण रोजगारदाता मुलुकमा रहेका श्रमिकको अवस्था र यस सम्बन्धमा भइरहेको तयारीबारे राष्ट्रिय मानव अधिकार आयोगको अगुवाइमा भएको छलफलमा महानिर्देशक दाहालले यस्तो बताएका हुन् ।
वैदेशिक रोजगारका क्रममा जोखिममा परेकाहरू, गर्भवती, बिरामी र यसै समयमा मृत्यु भएका नेपालीहरूको सम्बन्धमा सहि तथ्यांकको आधारमा उनीहरूको उद्धारका लागि सबै मिलेर काम गर्नुपर्ने र यसका लागि तथ्यांक संकलन भएरहेको उनले बताएका छन् ।
छलफलमा परराष्ट्र मन्त्रालय, श्रम, रोजगार तथा सामाजिक सुरक्षा मन्त्रालय, वैदेशिक रोजगार बोर्ड, वैदेशिक रोजगार विभाग, नेपाल वैदेशिक रोजगार व्यवसायी संघलगायतले गन्तव्य मुलुकहरूबाट तत्कालै उद्धार गर्न गृहकार्यहरू भइरहेको बताएका छन् ।
छलफलमा परराष्ट्र मन्त्रालयका सहसचिव हरिषचन्द्र घिमिरेले कोभिड–१९ सुरु भएपछि वैदेशिक रोजगारमा गएका नेपालीहरूको अवस्था, आप्रवासनका गएकाहरूको तत्काल समस्याहरूका बारेमा मन्त्रालयले गरेको तयारीका बारेमा जानकारी गराए । उनले तत्कालै उद्धार गर्नु पर्नेको तथ्यांक लिने र अन्य ब्यवस्था के के गर्नु पर्छ यसबारे सरोकारवालासँग सल्लाह भइरहेको र गन्तव्य देशले गर्ने व्यवस्था र नेपाल ल्याउने प्रक्रिया, आइसकेपछि राख्ने तथा क्वारेन्टाइन घरसम्म पु¥याउने व्यवस्थाका बारेमा पनि जानकारी दिएका छन् ।
त्यस्तै, छलफलमा वैदेशिक रोजगार बोर्डका कार्यकारी निर्देशक राजनप्रसाद श्रेष्ठले आप्रवासी श्रमिकहरूको हालसम्म बोर्डलाई प्राप्त तथ्यांक प्रस्तुत गरेका छन् । उनले यस समयमा विभिन्न कारणबाट मृत्यु भएका नेपालीहरूको शव ल्याउन कठिन भएको तथा उनीहरूको सन्दर्भमा सवै मिलेर काम गर्नु पर्ने बताए ।
छलफलमा श्रम, रोजगार तथा सामाजिक सुरक्षा मन्त्रालयका उपसचिव दीपक ढकालले महामारीपछि नेपाली श्रमिकलाई गर्नुपर्ने सहयोग र उद्धारका लागि अन्तरमन्त्रालय, गन्तव्य मुलुक तथा सरोकारवालास“ग छलफल भइरहेको बताएका छन् ।
कार्यक्रममा वैदेशिक रोजगार व्यवसायी संघका प्रतिनिधिहरूले सूचना संकलनलगायत गन्तव्य मुलुकमा रहेका नेपाली श्रमिकहरूको समस्या समाधानका लागि पहल गरिरहेको बताएका छन् । छलफलले आप्रवासी श्रमिकहरूको सुरक्षा, स्वदेश फिर्तीजस्ता प्राथमिकताका विषयहरू निर्धारण गर्न र नेपाल सरकारलाई सहयोग गर्नलगायत कार्यहरू गर्न आयोगका सदस्य पाठकको संयोजकत्वमा १७ सदस्यीय कार्यदल गठन भएको छ ।
