दोहा– कोरोना संक्रमणका कारण रोजगारी गुमाएर वा एक्जिट वा बिदा वा पुनः साउदी फर्कने गरी नेपाल जाने प्रबन्ध गरिदिन अनुरोध गर्दै ठूलो संख्यामा नेपाली कामदारहरू साउदीस्थित नेपाली दूताबासको सम्पर्कमा आउन थालेका छन् ।
वास्तविक समस्या लिई नेपाली दूताबासको सम्पर्कमा आउने नेपालीहरूको समस्या समाधानमा नेपाली राजदूताबास क्रियाशील रहेको जनाएको छ । दैनिक धेरै समस्याहरू समाधान भएको जनाउँदै दूताबासले सम्पर्कका अन्य माध्यमका अतिरिक्त टेलिफोनमार्फत दूताबासले संकलन गरेको अभिलेख महत्वपूर्ण हुने भएकाले समस्या समाधानमा आफूसमेत जिम्मेवार भई आङ्खना वास्तविक समस्या टिपाउनसमेत अनुरोध गरेको छ ।
दूताबास रियाद र महाबाणिज्यदूताबास जेद्दाको कार्यक्षेत्रअन्तर्गतका नेपाली कामदारका समस्याहरूको टिपोट, समाधानको पहल एवं अभिलेख राख्ने समन्वयको कार्यलाई व्यवस्थित गर्नुपर्ने भएकाले नेपाली महाबाणिज्यदूताबास जेद्दाको कार्यक्षेत्र (मक्का, मदिना जेद्दा, आभा खमिस, असिर, जिजान, नजरान) भित्र कार्यरत नेपालीहरूले सो महावाणिज्यदूताबासमा सम्पर्क गर्न सकिने बताइएको छ ।
पछिल्ला दिनमा यो संख्या बढ्दै गइरहेको छ । नेपाल सरकारले हाल जेठ ०७७ को पहिलो हप्तासम्मका लागि अन्तर्राष्ट्रिय उडानहरू बन्द गरेको छ भने साउदी सरकारले पनि अर्को सूचना नभएसम्मका लागि उडानहरू बन्द गरेको दूताबासले जनाएको छ ।
नेपाल सरकारले अन्तर्राष्ट्रिय आगमन उडानहरूबाट हुन सक्ने संक्रमणको जोखिम न्यून गर्न सूक्ष्म अध्ययन एवं आवश्यक कार्य गरिरहेको छ । नेपाललगायत दक्षिण एसियाका देशहरूले समेत संक्रमणको गति र जोखिम न्यूनीकरण गर्ने कार्यमा जोड दिएको पाइएको छ ।
नेपाल सरकारले विदेशबाट आउने कोही कसैबाट घरपरिवार र आफन्तमा कोरोना सर्न सक्ने वा आउनेहरूमा सर्न सक्ने सबै सम्भावनाहरूलाई विचार गरी विदेशमा रहेका र स्वदेश फर्कन चाहनेहरूको व्यवस्थापन गर्नेतर्फ आन्तरिक गृहकार्य गरिरहेको दूताबासले जनाएको छ ।
साउदीमा कोरोना भाइरसबाट संक्रमितको संख्या २१ हजार ४ सय २ पुगेको छ । बुधबार थप १ हजार ३ सय २५ जनामा संक्रमण भएको छ । कुल संक्रमितहरू मध्ये हालसम्म २ हजार ९ सय ५३ जना निको भएर घर फर्किसकेका छन् भने अहिलेसम्म १ सय ५७ जना संक्रमितको मृत्यु भइसकेको छ ।
