दोहा– कुवेतमा आइतबार थप १ जना नेपालीमा कोरोना भाइरस (कोभिड–१९) को संक्रमण पुष्टि भएसँगै कोरोना संक्रमित नेपालीको संख्या ४३ पुगेको छ । कुवेतको स्वास्थ्य मन्त्रालयले सार्वजनिक गरेको तथ्यांकअनुसार अनुसार १ नेपालीसहित १ सय ८३ जना नयाँ संक्रामित फेला परेका हुन् । योसँगै कुवेतमा कोरोना संक्रमित बिरामीको संख्या ३ हजार ७५ पुगेको छ ।
तीमध्ये २० जनाको ज्यान गएको छ, भने ८ सय ६ जना उपचारपछि पूर्णरूपमा निको भएका छन् । त्यस्तै ६१ जनाको गम्भीर अवस्थामा उपचार भइरहेको स्वास्थ्य मन्त्रालयले जानकारी दिएको छ । सबै संक्रमित नेपालीको उपचार भइरहेको र कुवेतले आङ्खना नागरिकसरह नै सेवा दिइरहेको कुवेतस्थित नेपाली दूताबासले जनाएको छ ।
कुवेत सरकारले हाल कायम गरिरहेका सार्वजनिक बिदा २८ मे सम्म लम्ब्याएको छ । दिनमा बेलुका ४ बजेदेखि बिहान ८ बजेसम्म १६ घन्टा कर्फ्यु देशव्यापी रूपमा लागू गरिरहेका छन । कर्फ्यु कहिलेसम्मको लागि हो त्यो भने उल्लेख गरेको छैन । महाबुला र जिलिब एरियालाई आईसोलेसनमा परिनत गरिएको छ ।
यसैबीच, कुवेत सरकारले अवैधानिक नेपाली कामदारलाई आममाफी दिने भएको छ । २६ अप्रिलदेखि ३० अप्रिलसम्म आममाफीका लागि आवेदन दिने समय तोकिएको कुवेतस्थित नेपाली दूताबासले जनाएको छ ।
२९ फेब्रअरीसम्म भिसाको म्याद सकिएका नेपाली नागरिकले यो मितिभित्र तोकिएको स्थानमा गई सबै आवश्यक प्रक्रिया पूरा गरी आवेदन दिन सक्ने दूताबासले जानकारी दिएको छ ।
यस्तो सुविधा उपयोग गर्न इच्छुक नेपालीहरूले अप्रिल २६ देखि ३० तारिखसम्म बिहान ९ बजेभित्र तोकिएको ठाउ“मा सम्पर्क राख्न सक्नेछन् । जिलिब हसविया क्षेत्रमा बस्ने र जिलिब हसविया क्षेत्रबाहिर बस्नेहरूको लागि छुट्टा–छुट्टै सम्पर्क स्थान तोकिएको दूताबासले जनाएको छ ।
जिलिब हसविया क्षेत्रमा बस्नेहरूको लागि सामान–लगेज २० केजी र ह्यान्डक्यारी ७ केजी नबढ्ने गरी लिन दूताबासले आग्रह गरेको छ । गैरकानुनी भएका पुरुषहरूलाई सम्पर्कका लागि जिलिब अल–सुएख, नयिम बिन मसुद स्कूल बोइज, ब्लक ४, स्ट्रिट २५०९ तोकिएको छ भने महिलाले जिलिब अल–सुएख, रूफाइदा अल–अस्लामिया प्राइमरी गल्र्स, ब्लक ४, स्ट्रिट २००९ मा सम्पर्क गर्न सकिने दूताबासले जनाएको छ ।
जिलिब हसविया क्षेत्र बाहेकका अन्य सबै क्षेत्रमा बस्नेहरूका लागि पुरुषले फर्बानिया गभर्नरेट–अल–मुथान्ना प्राइमरी स्कुल–ब्वाइज, ब्लक १, स्ट्रिट १२२ मा र महिलाले फर्बानीया गभर्नरेट–फर्मानीया प्राइमरी स्कुल–गल्र्स, ब्लक १, स्ट्रिट ७६ मा सम्पर्क गर्नुपर्नेछ ।
राहदानी भएका सिधै र राहदानी नभएकाहरू नेपाली दूताबासबाट ट्राभल डकुमेन्ट प्राप्त गरी सकेपछि मात्र जान दूताबासले आग्रह गरेको छ । म्याद बाँकी रहेका सक्कल नेपाली राहदानी भएकाहरूले आफ्नो व्यक्तिगत सामानहरू सहित थप निर्देशन नआउँदासम्म तोकिएको सेल्टरमा बस्न तयार हुने गरी माथि उल्लिखित केन्द्रमा सिधै जान सक्ने दूताबासले जनाएको छ ।
सक्कल नेपाली राहदानी, नेपाली नागरिकताको प्रमाणपत्र, सिभिल आइडी नभएका तर फोटोकपी भएकाहरूको हकमा उल्लिखित कागजातहरूको प्रतिलिपि तथा चार प्रति पासपोर्ट साइज फोटो लिई ट्राभल डकुमेन्टका लागि आवेदन दिन सकिने दूताबासले जनाएको छ ।
कागज नभएकाहरूको हकमा फिंगर प्रिन्टको आधारमा कुवेती अध्यागमनले दिने फिंगर प्रिन्ट रिपोर्ट प्राप्त गरेर मात्र चार प्रति पासपोर्ट साइज फोटो सहित ट्राभल डकुमेन्टको लागि त्यही स्थानमै आवेदन दिन सकिने दूताबासले जनाएको छ ।
सक्कल नेपाली राहदानी, नेपाली नागरिकताको प्रमाणपत्र, सिभिल आईडीको फोटोकपी मात्र भएकाहरूले चार प्रति पासपोर्ट साइज फोटोसहित नेपाली दूताबासमा अप्रिल २५ देखि अप्रिल ३० गतेसम्म दैनिक बिहान ९ देखि १ बजेभित्र सम्पर्क राखी ट्राभल डकुमेन्टका लागि आवेदन गर्न सकिने पनि दूताबासले जनाएको छ । त्यसपछि माथि तोकिएका स्थानमा सम्पर्क गर्नुपर्नेछ ।
दूताबासमा कुनै लगेज वा सामान लिएर नआउन भनेको छ । एकै दिनमा धेरै जनालाई ट्राभल डकुमेन्ट सम्बन्धी सेवा दिन अप्ठ्यारो हुने देखिएकाले अलग–अलग मिति ताकिएको दूताबासले जनाएको छ । यी कार्यमा एनआरएनए कुवेतले पनि सहयोग गर्ने जनाएको छ ।
-1745656903.jpeg)