असार लागेसँगै नेपालमा मनसुन सुरु भइसकेको छ । आकाशे पानीको भरमा गर्नुपर्ने कृषिका लागि यो उपयुक्त समय पनि हो । यो समयमा धेरैजसो स्थानमा धान खेतीका लागि रोपाइँ हुने गर्छ । तर केही स्थानमा भने अधिक वर्षाका कारण घरबास नै जोखिममा पर्छ । कतिपय ठाउँका खेतीबाली कटान हुन्छ भने कतिपय ठाउँमा पहिरो जाने गर्छ । जसका कारण मानवीयदेखि भौतिक क्षति हुने गर्छ ।
बुधबार दिउँसो चीन सरकारले तिब्बत क्षेत्रमा अत्यधिक वर्षा हुनसक्ने सम्भावना रहेको भन्दै भोटेकोशी नदी र सुनकोशी नदी बग्ने आसपासका क्षेत्रमा सतर्कता अपनाउन आग्रह गरेको छ । असार ३ देखि ७ गतेसम्म अत्यधिक वर्षाको अनुमान चीनले गरेको छ । लगातारको वर्षाले तातोपानीको लिपिङ बजारमा पहिरो खस्दा बुधबार तीन घरमा क्षति पुगेको छ । ठाउँठाउँमा पहिरो खस्दा बाटो अवरुद्ध भएको छ ।
नेपालको मौसम विभागले भने चीनले भनेजस्तो खतरा नरहेको जनाएको छ । विभागले बुधबार साँझ विज्ञप्ति जारी गर्दै भूउपग्रह तथा मौसम प्रारुपबाट प्राप्त तथ्यांक तथा सूचनाको हालको विश्लेषणका आधारमा सिन्धुपाल्चोक र सोको माथिल्लो जलाधार क्षेत्रमा हाल मनसुनको प्रभाव भए पनि कमजोर अवस्थामा रहेको उल्लेख गरेको छ ।
विगतका दिनहरुमा सिन्धुपाल्चोकको मेलम्ची नदी, भोटेकोशी नदीमा आकस्मिकरुपमा आएको बाढीका कारण ठूलो मानवीय क्षति भएका उदाहरण छन् । भोटेकोशी नदीमा थाहै नपाइ पनि कहिलेकाहीँ ठूला बाढी आउने गर्छ । सायद यसै विषयमा चीनले सूचना दिएको हुन सक्छ । नेपाली मौसमको राडारमा चिनियाँ आकाशको पूर्वानुमान गर्न सक्ने भए राम्रै हो । तर यदि त्यस्तो अवस्था नरहेमा तटीय क्षेत्रका बासिन्दाले सतर्कता अपनाउनु आवश्यक छ ।
यतिमात्र हैन सरकारले पनि यस्ता विपद्बाट जोगिन पूर्वतयारी गर्नैपर्छ । भोटेकोशी क्षेत्रमा पर्यटकका लागि स्थापना भएको रिसोर्टहरु छन् । त्यसैगरी अन्य विभिन्न परियोजनाहरुसमेत यस क्षेत्रमा छन् । यी स्थानमामात्र हैन देशभर मौसमी बदली जारी भएकोले सरकारले विपद्को पूर्वतयारी गर्नु आवश्यक छ । अविरल वर्षाका कारण सडक अवरुद्ध हुने, दुर्घटना हुँदा उद्धार गर्न नसकिनेजस्ता घटना पनि नेपालीले भोग्दै आएका छन् ।
यस्तो अवस्थालाई सकेसम्म न्यूनीकरणका लागि सरकारले पूर्वतयारी थाल्नुपर्छ । यसका लागि भोलि भन्दै नपर्खौं । आजै सुरु गरौं ।
