काठमाडौं– संयुक्त अरब इमिरेट्स (युएई) स्थित नेपाली राजदूताबासले नेपालीहरूलाई बिदामा नेपाल नआउन भनेको छ । दूताबासले बिहीबार सूचना जारी गर्दै युएईमा रहेका नेपालीहरूलाई आफूले काम गरिरहेको कम्पनीको भिसा रद्द गर्ने, आवास छाडने, बिदा लिई नेपाल जाने, आफ्ना परिवारका सदस्यहरूलाई युएई ल्याउनेलगायत कार्यहरू तत्काल बन्द गर्न आग्रह गरेको हो ।
नेपाल सरकारले नोभेल कोरोना भाइरसको संक्रमण रोकथाम तथा नियन्त्रण उच्चस्तरीय समन्वय समितिको १८ मार्च २०२० को बैठकले युरोपका सबै मुलुकहरू, पश्चिम एसियालगायत खाडी क्षेत्रका मूलुकहरू, इरान, टर्की, मलेसिया, दक्षिण कोरिया, जापानबाट आउने र ती मूलुकलाई ट्रान्जिट बनाई अन्य जुनसुकै मुलुकबाट आउने सबै यात्रुहरूलाई शुक्रबार मध्यरातिदेखि लागू हुने गरी १५ अप्रिल २०२० सम्म आगमनमा प्रतिबन्ध लगाउने निर्णय गरेको थियो ।
सोही निर्णयका आधारमा दूताबासले यूएईमा रहेका नेपालीलाई सरकारको स्वास्थ्य सुझावहरूको पालना गर्नसमेत आग्रह गरिएको छ । सूचनामा युएईको परिचयपत्र र नागरिकता संघीय प्राधिकरणको सूचनाअनुरूप युएईको आवासीय भिसा भएका व्यक्तिहरूका लागि १९ मार्च २०२० को अपराह्न १२ बजेदेखि दुई हप्ताका लागि आगमन निषेध गरेको जनाइएको छ ।
यसैबीच, सरकारले मलेसिया र युरोपबाट फर्कन नेपालीलाई पनि प्रतिबन्ध लगाएको छ । उच्च स्तरीय समितिको निर्णयले कोरोनाबाट अतिप्रभावित खाडी मलेसियालगायत युरोपबाट आउने नेपालीलाई समेत तत्कालका लागि प्रतिबन्ध लगाइएको परराष्ट्र मन्त्रालयले जनाएको छ ।
सरकारले कोरोना भित्रिन नदिन बनाएको रणनीतिका अनुसार कोरोना फैलिएको मुलुकबाट नेपालीलाई पनि नेपालमा आउन बन्देज गरेको हो । सरकारको निर्णयअनुसार शुक्रबारदेखि १५ अप्रिलसम्म युरोपका सबै मुलुक, पश्चिम एसियालगायत मलेसिया र खाडी क्षेत्रमा रहेका नेपालीहरू, इरान, टर्की, दक्षिण कोरिया, जापानबाट सोझै आउन पाउने छैनन् । ती मुलुकलाई ट्रान्जिट बनाई जुनसुकै मुलुकबाट समेत आउन सबै यात्रुलाई प्रतिबन्ध लगाइएको छ ।
तर, अन्य कतिपय मुलुकहरूले आफ्ना नागरिक कोरोना प्रभावित मुलुकबाट फर्किएको अवस्थामा १४ दिन क्वारेन्टाइनमा राखेर प्रवेश गर्न पाउने व्यवस्था गरे पनि नेपाल सरकारले पूरै प्रतिबन्ध लगाएपछि यसबारे विदेशमा रहेका नेपालीहरूले आलोचना गरिरहेका छन् । सरकार आफ्नो नागरिकप्रति जिम्मेवार हुनुपर्ने बेलामा सरकार नै गैरजिम्मेवार निर्णय गरेको भन्दै आलोचना गर्न थालेका छन् । त्यसो त यात्रु आवागमनमा प्रतिबन्धसँगै सरकारले अन्तर्राष्ट्रिय उडानसमेत प्रतिबन्ध लगाउने निर्णय गरेको छ ।
प्रकाशित मिति: शुक्रबार, चैत ७, २०७६ ०५:४१
-1752335779.jpg)
