दोहा– कोरोना भाइरसका बारेमा भ्रमपूर्ण सूचना फैलाउनेलाई ५ वर्ष जेल र ३० लाख रियाल जरिवाना रहने भन्दै साउदी अरबस्थित नेपाली दूताबासले नेपाली कामदारलाई सचेत रहन आग्रह गरेको छ ।
कोरोना भाइरसका बारेमा भ्रमपूर्ण समाचार फैलाएको आरोपमा साउदी अनुसान्धान ब्युरोले कुनै देशको एक जना नागरिकलाई पक्राउ गरी कानुनी कारबाहीको प्रक्रिया अघि बढाएको जनाइएको छ ।
कोरोना भाइरसको संक्रमण र फैलावट सम्बन्धमा साउदी सरकारका तथ्यांक र सूचनाभन्दा बाहिर गएर अनावश्यक नबोल्न र तथ्यहीन विषयहरू सोसल मिडियामा पोस्ट नगर्नसमेत दूताबासले अनुरोध छ ।
अत्यन्त संवदेनशील बन्दै गएको यो रोगको संक्रमण सम्बन्धमा कुनै अफवा फैलाउने सद्भाव खल्बल्याउने प्रकारका कुनै पनि कार्य नगर्न अनुरोध गर्दै दूताबासले कुनै गलत गतिविधि भेट्टाएमा यहाँको कानुनअनुसार अत्यन्त कडा सजाय हुने हुँदा सजग गराइएको हो ।
कोरोना भाइरसको संक्रमण साउदी अरबको राजधानी रियाद, पूर्व क्षेत्र एवं देशका विभिन्न स्थानमा फैलिँदै गएको सबैमा जानकारी नै छ । हिजोसम्म यो भाइरसबाट संक्रमितहरूको संख्या २३८ पुगेको छ । राजधानी रियादमा मात्र हिजो थप १९ जनामा यो संक्रमण देखिएको छ ।
कोरोना भाइरसको संक्रमण नियन्त्रण गर्ने महत्वपूर्ण प्रयासका रूपमा यहाँको स्वास्थ्य मन्त्रालयले मोबाइल प्रयोगकर्ताहरूमा एक सन्देश पठाई संक्रमण हुन नदिन अपनाउनुपर्ने सावधानीका बारेमा जानकारी गराउन सुरु गरेको छ । आफ्नो मोबाइलमा प्राप्त हुने सचेतनाका सूचनाहरूलाई पालना गर्न दूताबासले अनुरोध गरेको छ ।
साउदी सरकारले मक्का र मदिनाका दुई पवित्र मस्जिदबाहेक नियमित एवं हरेक शुक्रबार हुने विशेष प्रार्थनाका लागि खुल्ने गरेका देशभरीका मस्जिदहरू अर्को सूचना नभएसम्मका लागि बन्द गरेको छ ।
साउदी अरवमा कोरोना संक्रमितहरूको संख्या बढेको हुँदा संक्रमण रोक्न मानिसहरूको आवागमन धेरै हुने धार्मिक स्थल समेत बन्द गर्ने निर्णय गर्नुपरेको जनाइएको छ । सरकारी कार्यालयहरू, अदालत, विद्यालय तथा विश्वविद्यालय बन्द छन् भने निजी क्षेत्रका कम्पनी आदिमा ६० प्रतिशतभन्दा जनशक्तिबाट काम गराउन तथा सम्भव भएका कामहरू घरबाटै गर्ने वातावारण बनाउन साउदी सरकारले कम्पनीहरूलाई अनुरोध गरेको दूताबासले विज्ञप्ति निकालेर जानकारी दिएको छ ।
