काठमाडौं– बुधबारबाट मलेसिया सरकारले ‘लकडाउन’ गर्ने घोषणा गरेको छ । विश्वव्यापीरूप लिएको कोरोना भाइरसको संक्रमणलाई फैलिन नदिन भन्दै मलेसिया सरकारले आगामी १४ दिनसम्मका लागि लकडाउन घोषणा गरेको हो ।
बुधबारबाट मलेसियामा सार्वजनिक रूपमा भेला हुने, कुनै धार्मिक गतिविधि, खेलकुद, सामाजिक तथा सांस्कृति कार्यहरू गर्न नपाइने सरकारी सञ्चार माध्यम बनर्माले जनाएको छ । मलेसियन प्रधानमन्त्रीले आफ्ना नागरिकलाई नआत्तिन तथा त्रस्त नहुन आव्हान गरेका छन् । उनले खाद्यान्न तथा दैनिक आवश्यक वस्तुहरू, मास्कलगायत वस्तु पर्याप्त उपलब्ध गराइने बाचा पनि गरेका छन् । प्रधानमन्त्रीको घोषणाअनुसार सबै शैक्षिक संस्थाहरू पनि सो समयावधिमा बन्द रहनेछन् ।
प्रधानमन्त्रीको सम्बोधन अनुसार सो समयावधिमा सरकारी र निजी सबै निकाय बन्द रहनेछन् । तर अत्यावश्यक वस्तुहरू बेच्ने स्थान, खाद्यान्न आपूर्ति, यातायात, बैंक, स्वास्थ्य संस्थाहरू तथा औषधि पसलहरू, सञ्चार सम्वन्धि कार्यालयहरू, सरसफाई सम्वन्धि काम, विमानस्थल, बन्दरगाहहरू भनें सञ्चालनमा रहनेछन् ।
लकडाउन अवधिभर देशबाहिर जान मलेसिया सरकारले आफ्ना नागरिकहरूलाई प्रतिबन्ध लगाइएको छ । देशबाहिर रहेका मलेसियनहरू भने स्वदेश फर्किने सक्ने बताइएको छ । तर, त्यसरी फर्किएका मलेसियनहरूले स्वास्थ्य परीक्षण गर्नुपर्नेछ । स्वास्थ्य परीक्षणबाट कोरोना नभेटिए पनि १४ दिन सेल्फ क्वारेन्टाइनमा बस्न अनिवार्य गरिएको छ ।
लकडाउन अवधिमा पर्यटक र आप्रवासीलाई समेत प्रवेश रोक लगाइएको मलेसियास्थित सरकारी अधिकारीलाई उद्धृत गर्दै त्यहाँका सञ्चारमाध्यमहरूले जनाएका छन् । सरकारी तथा निजी कार्यालयसँगै शैक्षिक संस्थाहरू पनि यो अवधिमा पूर्णतः बन्द हुनेछन् । यातायात, स्वास्थ्य संस्था, वित्तीय क्षेत्र, औषधि, खाना, ग्यासलगायत अत्यावश्यकीय सेवा प्रवाह भने पूर्ववत् सञ्चालन हुने जनाइएको छ ।
नेपालीको प्रमुख रोजगार गन्तव्य मलेसियाले बुधबारबाट आगामी १४ दिनसम्म गरेको लकडाउनले नेपालीहरू प्रभावित हुने भएका छन् । लकडाउनको घोषणापछि मलेसियाको बजारमा खाद्यन्न तथा दैनिक उपभोग्य सामान किन्नेहरूको भीड छ । विश्वव्यापी बनेको कोरोना संक्रमण मलेसियामा पनि देखिएको छ । मलेसियामा हालसम्म ५ सय ६६ मानिसमा कोरोनाको लक्षण देखिएको छ । यद्यपि, अहिलेसम्म यो संक्रमणका कारण ज्यान भने गएको छैन । मलेसिया गर्मी देश भएकाले कोरोना संक्रमित ४२ जना स्वास्थ्यलाभ गरेर घर फर्किएका छन् ।
