दोहा– कतारस्थित नेपाली दूताबासले कतार सरकारले निषेध गरेको क्षेत्रमा नजान नेपालीलाई आग्रह गरेको छ । कतार सरकारले तोकेका निषेधित क्षेत्रहरूमा नजान वा कुनै पनि भेला नहुन कतारस्थित नेपाली दूतावासले आग्रह गरेको छ । श्रमिकहरू बस्ने क्षेत्र आसपासमा अवैधानिक पसल राखी सामानहरूको किनबेच गर्ने पाइएको भन्दै कम्पनीको आधिकारिक व्यक्तिसँग तोकिएको संख्या (२जना) मात्र आधिकारिक स्थानबाट सामान किनमेल गर्न आग्रहसमेत दूताबासले अनुरोध गरेको छ ।
कतार सरकारको सम्बन्धित सरकारी निकायहरूबाट जारी हुने सबै प्रकारका निर्देशनहरूलाई अक्षरस पालना गर्न पनि दूताबासले अनुरोध गरेको छ ।
सरकारले क्वारेन्टाइनमा नबसेको र सार्वजनिक स्थानमा हिँडेको अभियोगमा केहि नेपालीलाई डिपोट गरेको समाचार आएपछि दूताबासको यस्तो विज्ञप्ति आएको हो ।
दूताबासले केहि नेपालीलाई बिनाकारण नेपाल फर्काइएको भन्ने समाचारको आधिकारिकताका सम्बन्धमा कतार सरकारको सम्बन्धित निकायहरूसँग जानकारी लिने काम भइरहेको नेपाली दूताबासका द्वितीय सचिव प्रवीण भट्टराईले जानकारी दिए ।
केही श्रमिकलाई डिपोर्ट गरिएको सम्बन्धमा नेपालबाट परराष्ट्र र कन्सुलर सेवाबाट चिठ्ठी आएको तर त्यस सम्बन्धमा दूताबासले जानकारी लिइरहेकाले अहिले नै कति श्रमिक डिपोर्ट भए र किन गरियो भन्नेबारे केहि भन्न नसकिने सचिव भट्टराईले बताए ।
