काठमाडौं– अष्ट्रेलियामा प्रवेश गर्ने हरेकले क्वारेन्टाइन बस्नुपर्ने भएको छ । कोरोना भाइरसको जग्जगी बढेपछि अष्ट्रेलियाका प्रधानमन्त्री स्टक मौरिसनले आफ्नो मुलुकमा आउने सबैलाई दुई साता क्वारेन्टाइनमा बस्न निर्देशन दिएका हुन् ।
अब भने अष्ट्रेलिया पुग्ने जो कोहीले पनि दुई सातासम्म क्वारेन्टाइनमा बस्नुपर्ने भएको छ । अन्तर्राष्ट्रिय समाचार एजेनसीका अनुसार न्युजिल्यान्डले आफ्नो सीमामा विश्वकै सबैभन्दा ठूलो कडाइ गरेसँगै अष्ट्रेलियाले पनि कोरोना भाइरस नियन्त्रणका लागि यस्तो कदम चालेको हो । कोरोना भाइरसलाई नियन्त्रणका लागि चालिएको यो कदम महत्वपूर्ण रहेको अष्ट्रेलियन सरकारले जनाएको छ ।
प्रधानमन्त्री मौरिशनको निर्देशनअनुसार आइतबार रातिदेखि अष्ट्रेलिया प्रवेश गर्ने हरेकव्यक्ति क्वारेन्टाइनमा बस्नुपर्ने भएको छ । साथै अष्ट्रेलियामा ३० दिनसम्म विदेशी जहाजलाई प्रतिबन्ध लगाएको छ । तर, विद्यालयहरू भने नियमितरूपमा सञ्चालन हुनेछन् । अष्ट्रेलियामा अहिलेसम्म कोरोना भाइरसका २५० संक्रमित देखिएका छन्, जसमध्ये ३ जनाको ज्यान गएको छ ।
प्रधानमन्त्री मौरिसनले बाहिरबाट आएका मानिसबाट यो रोग सर्ने सम्भावना प्रबल रहेकाले यस्तो योजना ल्याइएको बताएका छन् । यो भाइरसलाई पूर्णरूपमा रोक्न नसक्ने भए पनि सुस्त बनाउन सरकारले प्रयास गरिरहेको उनले बताए । बाहिर हिँड्दा पनि अरु मानिसभन्दा केही पर रहन र हात नमिलाउन पनि प्रधानमन्त्री मौरिशनले आग्रह गरेका छन् ।
यता, इटालीमा कोरोना भाइरसका कारण ज्यान गुमाउनेको संख्या १ हजार ४ सय ४१ जना पुगेका छन् भने संक्रमित हुनेको संख्या २१ हजार नाघेको सरकारले जनाएको छ । कोरोना भाइरसको संक्रमणबाट चीनपछि इटलीमा सबैभन्दा धेरै जनाको ज्यान गएको छ । सिभिल प्रोटेक्सन डिपार्टमेन्टका अनुसार इटलीमा पछिल्ला दिनमा कोरोनाको संक्रमणमा वृद्धि भएको छ । त्यस्तै ज्यान गुमाउनेको सङ्ख्या पनि बढिरहेको छ । संक्रमितमध्ये झन्डै दुई हजार जना उपचारपछि घर फर्किएका छन् । एक हजार पाँच सय जना भाइरसको संक्रमणबाट गम्भीर छन् ।
इटलीका उपस्वास्थ्य मन्त्री पियरपोलो सिलेरीमा पनि कोरोना भाइरसको संक्रमण पाइएको थियो । भाइरसबाट इटलीका अधिकारीहरू पनि संक्रमित भएको समाचार छ । चीनको वुहानबाट फैलिएको कोरोना भाइरस अहिलेसम्म एक सय ५० भन्दा बढी देशमा पुगिसकेको छ । विश्वभरि एक लाख ५९ हजारभन्दा बढीमा सङ्क्रमण पाइएको छ भने झन्डै ७६ हजार जना उपचारपछि घर फर्किएका छन् ।
