दोहा– चीनको वुहानबाट फैलिएको नोभेल कोरोना भाइरस (कोभिड–१९) को प्रकोप अहिले खाडी मुलुकमा पनि देखिएको छ । कोरोना भाइरसका कारण कुवेत, साउदी अरब र बहराइनमा रहेका नेपाली दूताबासले श्रमिकको मागपत्र प्रमाणीकरण गर्न बन्द गरेको दूताबासहरूले जनाएका छन् ।
कोभिड – १९ रोकथाम तथा नियन्त्रण उच्चस्तरीय समन्वय समितिको बैठकले वैदेशिक रोजगारीमा जाने श्रमिकलाई श्रम स्वीकृति दिन बन्द गरेपछि कुवेत, साउदी र बहराइनमा रहेका नेपाली दूताबासले मागपत्र प्रमाणीकरणको काम बन्द गरेको जानकारी दिएका हुन् ।
कुवेत, बहराइन र साउदीबाट आउने संस्थागत र व्यक्तिगत दुवै माग प्रमाणीकरणको काम अस्थायी रूपमा बन्द गरिएको दूताबासले जनाएका छन् । खाडीस्थित दूताबासहरूले सूचना जारी गर्दै नआत्तिएर सतर्कता अपनाउन आग्रह गरेको छ ।
कोरोना नियन्त्रणमा नआएसम्म स्वास्थ्य संवेदनशीलतालाई ध्यानमा राखी अत्यावश्यकबाहेक ठूलो जमघटन नगर्न र भिडबाट टाढा रहनसमेत अनुरोध गरेको छ । कोरोनाको शंका लागेमा दूताबास, त्यहाको स्वास्थ्य मन्त्रालयमा सम्पर्क गर्न दूताबासहरूले जनाएका छन् ।
यता, कतारमा अहिलेसम्म नेपालीहरू कोरोना संक्रमणबाट सुरक्षित रहेका छन् । कतारमा अहिलेसम्म नेपालीहरू कोरोना संक्रमणबाट सुरक्षित रहेको कतारका लागि नेपाली राजदूत नारदनाथ भारद्धाजले बताए ।
कतारमा भाइरस संक्रमितको संख्या ३३७ पुगेको छ । भाइरस कतारको अन्डर कन्ट्रोलमै रहेका कारण सर्वसाधारणलाई नअत्तालिन कतार सरकारले आग्रह गरेको छ । कतारमा हालसम्म भाइरसको कारण कसैको ज्यान गएको छैन ।
