काठमाडौं– साउदी अरेबियाले कोरोना भाइरसको संक्रमण फैलिन रोक्ने उद्देश्यले दुई हप्ताका लागि अन्तर्राष्ट्रिय उडान रोक्ने निर्णय गरेको छ । साउदी अरबको आन्तरिक मन्त्रालयका अनुसार शुक्रबार २४ जना नयाँ बिरामी थपिएसँगै संक्रमणलाई फैलिन नदिन भन्दै साउदी अरबले आइतबारदेखि नै लागू हुने गरी दुई हप्तासम्मका लागि सबै अन्तर्राष्ट्रिय उडान रोकेको हो ।
योसँगै साउदी अरेबियामा कोरोना भाइरसका संक्रमितको संख्या ८६ पुगेको छ । साउदी प्रेस एजेन्सीलाई उद्धृत गर्दै अरब न्यूजले अन्तर्राष्ट्रिय उडान आइतबार बिहान ११ बजेदेखि रोकिने उल्लेख गरेको छ । मन्त्रालयले दुई साता बीचमा केहि ‘अपवाद स्वरूप’ भने उडान हुने बताएको छ ।
यसबीचमा साउदी अरबबाट फर्किन चाहनेहरूका लागि भने स्वास्थ्य मन्त्रालय, अन्तरिक मन्त्रालय, उड्डयन प्राधिकरण लगायतको समन्वयमा व्यवस्था हुने जनाइएको छ ।
साउदी अरेबियाका लागि नेपाली राजदूताबास रियादले एक सूचना प्रकाशित गरी कोरोना भाइरसबाट संक्रमितहरूको संख्या साउदी अरबमा पनि दिनानुदिन बढ्दै गइरहेको सन्दर्भमा साउदी सरकारले आइतबारदेखि दुई हप्ताका लागि सम्पूर्ण हवाइ सेवा स्थगित गरेको जनाएको छ । साउदी सरकारको हवाइ सेवा बन्द गर्ने निर्णयका कारण साउदी फर्कन नसक्नेहरूका लागि दुई हप्ताको विशेष बिदा दिने निर्णय गरेको पनि साउदी सरकारले जारी गरेको सूचनामा उल्लेख छ ।
आगामी दुई हप्ताका लागि साउदीमा रहेका नेपाली नागरिकहरू घर बिदामा नेपाल आउने तथा घर बिदामा नेपालमा रहेकाहरू नेपालबाट साउदी आउन सक्ने अवस्था नरहेको दूतबवासको सूचनामा जनाइएको छ ।
साउदी सरकारले दुई हप्ताका लागि हवाइ सेवा बन्द गरेपछिको परिस्थितिलाई समेत विचार गरी यस राजदूताबासले प्रदान गर्दैआएका सेवाग्राहीको भिडभाडपूर्ण उपस्थिति हुने निम्न सेवाहरू हाल स्थगित गरिएको व्यहोरासमेत सूचनामा उल्लेख छ ।
घरेलु कामदारहरूका लागि जारी गरिने पुनः श्रम स्विकृति सिफारिस, घर बिदामा नेपालमा भएकाहरूले पनि यस अवधिमा आफ्ना कफिलहरूलाई सिफारिसका लागि राजदूताबासमा नपठाउन पनि सूचनामा उल्लेख छ ।
