काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगारबाट फर्किएर (रिटर्नी) उद्यम गरिरहेकाहरुलाई सम्मान तथा पुरस्कारका लागि आवेदन आह्वान गरेको छ । मन्त्रालयले स्वदेशमै उद्यमशीलतामा लाग्न प्रोत्साहित गर्ने उद्देश्यले प्रत्येक वर्ष यस्ता उद्यमीलाई सम्मान तथा पुरस्कार प्रदान गर्दै आएको छ ।
यही पुस १६ गते प्रकाशित सूचनामा मन्त्रालयले स्वदेश फर्किएर उदारणीय उद्यम सञ्चालन गरिरहेका उद्यमीलाई सम्मान तथा पुरस्कारका लागि दाबी पेस गर्न आह्वान गरेको हो । यसका लागि आगामी माघ ७ गतेभित्र आवेदन दिइसक्न आग्रह गरिएको छ ।
मन्त्रालयका अनुसार आवेदक कार्य (वर्क) भिसामा विदेश गएर कम्तीमा एका वर्ष काम गरेर फर्किएको हुनुपर्ने छ । यसैगरी विदेशबाट फर्किएर उद्यम सञ्चालन गरेको न्यूनतम एक वर्ष पूरा गरेको हुनुपर्ने छ । गत वर्षहरुमा आवेदन दिएका तर छनोटमा नपरेका उद्यमीहरुले पनि यसमा सहभागी हुन पाउने छन् । तर, मन्त्रालयबाट पछिल्लो पाँच वर्षभित्र सम्मान तथा पुरस्कार पाएका उद्यमीले भने यो प्रक्रियामा भाग लिन पाउने छैनन् ।
छनोटमा परेका उद्यमीहरुलाई नगद पुरस्कारसहित प्रमाणपत्र प्रदान गरिने मन्त्रालयले जनाएको छ । मन्त्रालयका अनुसार यो कार्यक्रमको उद्देश्य स्वदेशमै उद्यमशीलता प्रवद्र्धन गर्दै वैदेशिक रोजगारमा बढ्दो निर्भरता घटाउनु हो । यसले मुलुकको आर्थिक विकासलाई सघाउ पुर्याउनका साथै उद्यमशील व्यक्तिलाई समाजमा सम्मानको वातावरण सिर्जना गर्ने मन्त्रालयको भनाइ छ ।
सरकारले विदेशमा आर्जन गरेको सीप र पुँजीको उपयोग गरी मुलुकमा उद्यमशीलता प्रवद्र्धन गर्ने नीतिका साथ काम गरिरहेको बताइए पनि प्रभावकारी बन्न नसकेको सरोकारवालाहरु बताउँछन् । यस खालको सम्मान तथा पुरस्कारले थोरै भए पनि प्रोत्साहन मिल्ने उनीहरुको भनाइ छ ।
