काठमाडौं– वैदेशिक रोजगारमा गएर या विदेशबाट दुःख पाएर फर्किने महिलाहरूको उद्धार गरेर उनीहरूलाई सुरक्षित स्थानसम्म पुर्याउने गरी एनआरएनए र शक्ति समूहबीच सम्झौता भएको छ । मंगलबार एनआरएनएको कार्यालयमा एनआरएन महिला संयोजक भोमादेवी लिम्बू र शक्ति समूहकी अध्यक्ष चरीमाया तामाङले सहकार्य गर्ने सम्झौतापत्रमा हस्ताक्षर गरेका हुन् ।
कार्यक्रममा एनआरएनए महिला संयोजक लिम्बूले वैदेशिक रोजगारका क्रममा दुःख पाएका महिलाहरूका लागि एनआरएनएले पहिलादेखि नै केही न केही सहयोग गरिरहेको अवस्थामा अव स्वदेश फर्किएपछि पनि उनीहरूको अवस्था उकास्न शक्ति समूहबीच सम्झौता गरिएको बताएकी छन् ।
यसअघि एनआरएनले वैदेशिक रोजगारमा गएर या विदेशबाट दुःख पाएर फर्किने महिलाहरूलाई उद्धार गरेर स्वदेश पठाउने मात्र गरेकामा यसबाट पीडित महिलाहरू समाजमा स्थापित हुन समस्या भएपछि अब उनीहरूको अवस्था माथि उकास्नका लागि एनआरएन र समूहबीच सहकार्य गरिने उनले बताइन् । उनका अनुसार एनआरएनले महिलाहरूलाई उद्धार गरेर स्वदेश पठाउने र त्यसपछि शक्ति समूहले आफ्नो सेल्टरमा राखेर उनीहरूको स्वास्थ्य उपचार गर्नेसम्मको सहमति भएको छ । यसका साथै उपचारपछि ती पीडित महिलालाई आफ्नो घरसम्म पनि पुर्याउने काम समूहले गर्ने सम्झौतामा उल्लेख छ । अब भने वैदेशिक रोजगारीमा पीडित भई फर्केका महिलाको सहजीकरणका लागि सम्झौता भएपछि पीडित महिलाहरूले राहत पाउने आसा गरिएको छ ।
सहमतिपत्रमा विदेशबाट फर्किएका महिला कामदारका लागि सकेसम्म विमानस्थलमै नभए उपयुक्त ठाउँमा हेल्प डेक्स स्थापना गर्ने, विदेशबाट एनआरएनले उद्धार गरी फर्काएको महिलालाई शक्ति समूहको सेल्टरमा राखेर स्वास्थ्य उपचार तथा परामर्श दिने र त्यसवापत लागेको खर्च एनआरएनएले ब्यहोर्ने रहेको छ ।
कार्यक्रममा यो सम्झौताले महिला बेचबिखनविरुद्ध नयाँ आयाम थपिने समूहकी अध्यक्ष तामाङले बताएकी छन् । एनआरएन विश्वभर हुने र वैदेशिक रोजगारको क्रममा विदेशिएका नेपाली चेलीहरू जो अप्ठ्यारो परिस्थितिमा अथवा मानव बेचविखनमा परेको पहिचान भएपछि उद्धार गरेर नेपाल पठाउने उनले आशा गरेकी छन् । उनीहरूलाई नेपाल ल्याइएपछि समाजमा पुनस्र्थापना गर्न समूहले भूमिका खेल्ने उनले बताइन् ।
-1745656903.jpeg)