काठमाडौं– कतारको श्रम स्विकृति दिने कार्य अर्को सूचना जारी नभइन्जेलसम्मका लागि वैदेशिक रोजगार विभागले स्थगन गरेको छ ।
विश्वव्यापी महामारीको रूप लिइरहेको कोरोना भाइरस (कोभिड १९) का कारण कतारले नेपालसहित १४ देशका नागरिकहरूलाई आफ्नो देशमा प्रवेशमा रोक लगाएकाले वैदेशिक रोजगार विभागले पनि मंगलबारबाट नै लागू हुने गरी श्रम स्विकृति अर्को सूचना जारी नभइन्जेलसम्मका लागि स्थगन गरेको हो । मंगलबारबाट नै विभागबाट कतारको लागि जारी हुने श्रम स्विकृति (संस्थागत र व्यक्तिगत दुवै) स्थगित गभएको मंगलबार सूचना जारी गरेको छ ।
यसैबीच, अर्को सूचना नभएसम्मका लागि काठमाडौंस्थित कतार भिसा सेन्टर (क्युभिसी) को सेवा पनि बन्द भएको छ । यो केन्द्रले कामदारहरूको स्वास्थ्य परीक्षण, भिसा प्रक्रियाको काम गर्दै आएको छ ।
यता, कतार जान श्रम स्विकृति लिने कार्य रोकिएपछि वैदेशिक रोजगार प्रभावित भएको छ । मुलुकको प्रमुख वैदेशिक रोजगार गन्तव्य कतारका लागि श्रम स्विकृति बन्द भएपछि युवाहरूमा अन्योलता छाएको बताइन्छ ।
कतार सरकारले सोमबार सूचना जारी गरी नेपालसहित १४ देशका नागरिकलाई कोरोना भाइरसका कारण प्रवेशमा अस्थायी प्रतिबन्ध लगाएपछि नेपाल सरकारले श्रम स्विकृति दिन बन्द गरेको हो । कतार सरकारले अस्थायी प्रतिवन्ध लगाएपछि कामदारलाई श्रम स्विकृति दिन बन्द गरिएको विभागले जनाएको छ ।
कतार र नेपालको यो निर्णयपछि धेरै कामदारले टिकट र श्रमस्विकृति लिइसके पनि उड्न पाउने छैनन् । हजारौँ नेपाली कामदार कतार उड्न नपाएपछि वैदेशिक रोजगारको क्षेत्र नै प्रभावित हुने वैदेशिक रोजगार व्यवसायीहरूले बताएका छन् ।
यसैबीच, नेपाल वैदेशिक रोजगार व्यवसायी संघका महासचिव सुजितकुमार श्रेष्ठले कामदारलाई पठाउँदा साउदी अरेबिया र बहराइनका लागि युएई हुँदै ट्रान्जिटको टिकट सबै व्यावसायीहरूलाई सूचित गरिएको बताएका छन् ।
प्रकाशित मिति: बुधबार, फागुन २८, २०७६ ०५:१०
-1745656903.jpeg)