दोहा– विदेश भ्रमण भन्नेबित्तिकै सांसदहरूले मौकालाई खेर जानै दिँदैनन् । त्यसैले खाडी मुलुकमा कोरोनाको कहर बढ्दै जाँदा पनि सांसदहरू घरेलु कामदारको अबस्था बुझ्न भन्दै खाडी पुगेका हुन् ।
खाडी मुलुकमा घरेलु कामदारको अध्ययनका लागि भन्दै नेपाली संघीय संसद प्रतिनिधि सभाअन्तर्गत उद्योग तथा वाणिज्य र श्रम तथा उपभोक्ता हित समिति र राष्ट्रिय मानव अधिकार आयोगको संयुक्त टोली अहिले खाडीमा पुगेको छ । टोलीले घरेलु कामदारको रूपमा ओमानलगायत खाडी मुलुक ओमान, साउदी अरब र युएईमा रहेका घरेलु कामदारहरूको विद्यमान अवस्था, समस्या तथा समाधानको लागि चालिनु पर्ने कदमका विषयमा ओमानमा स्थलगत अवलोकन गरेको छ ।
घरेलु कामदारका सम्बन्धमा संसदका समितिले खाडीका विभिन्न मुलुक भ्रमण तथा अध्ययन गरी घरेलु कामदारका लागि स्विकृति दिने वा नदिने निष्कर्ष दिने बताइएको छ ।
समितिका सभापति विमलप्रसाद श्रीवास्तवको नेतृत्वमा रहेको भ्रमण दलले ओमानको शुरा काउन्सिल (प्रतिनिधि सभा) का अध्यक्ष खालिद बिन हिलाल अल मावली र स्टेट काउन्सिल (राष्ट्रिय सभा) का अध्यक्ष याह्या विन महफौद अल मन्थरीसँग बेग्ला–बेग्लै द्विपक्षीय भेटघाट गरेको थियो ।
उक्त भेटघाटमा दुवै देशका प्रतिनिधिहरूबीच संसदको संरचना, संसदीय व्यवस्था, प्रतिनिधित्व तथा संसदमा मौजुद समितिहरूबारे छलफल भएको थियो । साथै, दुवै सदनको गरिमा, भूमिका तथा कानुन बन्ने प्रक्रियाबारे समेत छलफल भएको थियो ।
भ्रमण टोलीले परराष्ट्र मन्त्रालयका सचिव शेख खालिफा विन अलि अल हार्थी तथा परराष्ट्र मन्त्रालयका अन्य उच्च पदस्थ पदाधिकारीहरू तथा जनशक्ति मन्त्रालयका सचिव हमाद विन खामिस विन अब्दुल्लाह अल आम्रीलाई उनीहरूकै कार्यकक्षमा भेटघाट गर्दै श्रम सम्बन्धी विद्यमान कानुनी व्यवस्था, नेपाली कामदारहरूको बारेमा सरकारको बुझाई तथा कामदारको हकहितका सम्बन्धमा जिज्ञासा राखिएको ओमनस्थित नेपाली दूताबासले जानकारी दिएको छ ।
यता, ओमन भ्रमण सकेर साउदी अरब पुगेको संघीय संसद प्रतिनिधि सभाअन्तर्गत उद्योग तथा वाणिज्य र श्रम तथा उपभोक्ता हित समिति र राष्ट्रिय मानव अधिकार आयोगको संयुक्त टोलीलाई गैरआवासीय नेपाली संघ (एनआरएनए), साउदीले संसदीय समितिलाई संघका तर्फबाट ध्यानाकर्षण पत्र बुझाउँदै नेपालीलाई घरेलु कामदारका रूपमा काम गर्न साउदी नपठाउन आग्रह गरेको छ ।
म्यानपावर ब्याबसायीबाट नेपाली श्रमिकहरू ठगिने, छिमेकी मुलुक भारतलगायत अन्य मुलुक हुँदै खाडीका बिभिन्न देशहरूमा नेपाली महिलाहरू बेचिने, घरेलु महिला कामदार अन्याय अत्याचार, मानसिक तथा शरीरिक शोषणमा परेको तितो यथार्थ बारे उक्त टोलीलाइ ध्यानाकर्षण गराइएको गैर आवासिय नेपाली संघ राष्ट्रिय समन्वय परिषद् साउदी अरबले जनाएको छ ।
साथै साधारण कामदारहरूका सम्बन्धमा नेपाल सरकारले तोकेको सेवा शुल्क अपारदर्शी र ब्यबहारिक नभएकाले गर्दा म्यानपावरहरूले कामदारबाट लाखौँ असुलेर दश हजारको मात्र रसिद दिनुले गर्दा कामदार झन ठगिको सिकार हुँदै आएको जानकारी गराएको छ । तसर्थ बैदेशिक रोजगारमा आउने कामदारबाट कति रकम लिने हो यकिन गरी सम्बन्धित कामदारले नै बैदेशिक रोजगार विभागको बैंक खातामा जम्मा गर्ने र सम्बन्धित म्यानपावरलाइ सरकारले नै उक्त रकम बैंकमार्फत जम्मा गरिदिने ब्यबस्था गर्न समितिलाई आग्रह गरेको ध्यानाकर्षण पत्रमा उल्लेख गरिएको छ । भ्रमण टोली ओमान, साउदी अरब हुँदै यति बेला युएई पुगेको छ ।
प्रकाशित मिति: आइतबार, फागुन २५, २०७६ ०५:११
-1745656903.jpeg)