काठमाडौं– कोरोना संक्रमणका कारण श्रम, रोजगार तथा सामाजिक सुरक्षा मन्त्री रामेश्वर राय यादवको जापान भ्रमण स्थगित भएको छ । कोरोना भाइरसको प्रकोप बढ्दै गएपछि मन्त्री यादवको मार्चमा हुने जापान भ्रमण स्थगित भएको हो ।
नेपाल–जापानबीच भएको श्रम समझदारी कार्यान्वयनका सम्बन्धमा छलफलका लागि यही मार्चमा जान लागेका मन्त्री यादवको जापान भ्रमण कार्यक्रम स्थगित भएको छ । यही मार्चमा जापान र नेपालबीच मन्त्रीस्तरीय छलफलसँगै संयुक्त कार्यदल कमिटीको बैठकसमेत बस्ने कार्यक्रम रहेको थियो । उक्त बैठकले नेपाल–जापानबीच समझदारी कार्यान्वयनको पाटो टुंगोमा पुर्याउने मन्त्रालयले जानकारी दिएको थियो ।
कोरोना संक्रमणका कारण मन्त्री यादवको भ्रमण तथा छलफललगायतका कार्यक्रम तत्कालका लागि स्थगित गरिएको मन्त्रालयले जनाएको छ । मन्त्रालयका अनुसार कोरोना संक्रमणका कारण भ्रमण हालका लागि स्थगित गरिएको र भ्रमणको मिति हालका लागि टुंगो लागेको छैन ।
जापानले कृषि उद्योग, निर्माण, नर्सिङ केयरलगायत विभिन्न १४ क्षेत्रमा नेपाली कामदार लैजाने गरी गत वर्षको नै समझदारी भएको हो । समझदारीपछि जापानले पहिलो चरणमा नर्सिङ केयरमा कामदार लैजाने जनाएको छ । सोहीअनुसार भाषा तथा सीप परीक्षा समेत भइरहेको छ । तर कामदार कुन प्रक्रियामार्फत जापान पठाउने कहिलेदेखि पठाउने विषयको टुंगो भने लाग्न सकेको छैन ।
