काठमाडौं– जापान लैजाने भन्दै विभिन्न किसिमिका भ्रम बाहिर आइरहेको बेला वैदेशिक रोजगार विभागले यस्तो भ्रम नछर्न चेतावनी दिएको छ । जापानमा वैदेशिक रोजगारीमा लगाउने भन्दै केही समयदेखि विभिन्न पत्रपत्रिकाहरूमा विज्ञापन प्रकाशन गरेपछि विभागले बिहीबार सूचना जारी गर्दै यस्तो विज्ञापन नगर्न चेतावनी दिएको हो ।
जापान पठाइदिने भन्दै विभागबाट इजाजतपत्र÷ अनुमति नलिएका संस्थाहरू (शैक्षिक परामर्श केन्द्रहरूसमेत) बाट विभिन्न व्यक्तिहरूसँग रकम असुल उपर गरी ठगी गर्ने गरेको विषयमा विभागमा लिखित एवं मौखिक उजुरीहरू प्राप्त भएको विभागले जनाएको छ । विभागले अनुमति लिएकादेखि बाहेकका संस्थाहरूबाट जुनकुनै प्रक्रियाले वैदेशिक रोजगारीका लागि जापान पठाउने भनी प्रकशित गरिने सूचनाहरू गैरकानुनी भन्दै उप्रान्त यस्तो प्रकृतिको विज्ञापन प्रकाशन नगर्न नगराउन पनि विभागले चेतावनी दिएको छ । साथै यही प्रयोजनका लागि कुनै व्यक्तिसँग रकम लेनदेन नगर्न, नगराउन पनि विभागले आग्रह गरेको छ ।
विभागको सूचनालाई अवज्ञा गरी कसैले नियमविपरित विज्ञापन प्रकाशन गरे÷ गराए वा रकमको लेनदेन गरेर गराएमा वैदेशिक रोजगार ऐन, ०६४ र नियमावली ०६४ बमोजिम कारबाही एवं सजाय हुने पनि विभागले जनाएको छ । वैदेशिक रोजगारीका लागि जापान वा अन्य कुनै मुलुक जान चाहने व्यक्तिले सो सम्बन्धी विषयको आधिकारिक निकायबाट जानकारी प्राप्त गरेर मात्र प्रक्रिया अगाडि बढाउन पनि विभागले सूचनामा भनेको छ ।
प्रकाशित मिति: शुक्रबार, फागुन २३, २०७६ ०५:२३
-1745656903.jpeg)