काठमाडौं– रोजगारदाता देशले नरोकेसम्म वैदेशिक रोजगारमा पठाउने काम बन्द नगरिने नेपाल वैदेशिक रोजगार व्यावसायी संघले जनाएको छ । कारोना भाइरसका कारण विभिन्न हल्ला बाहिर आइराखेपछि संघले आफ्नो आधिकारिक धारणा सार्वजनिक गर्न मंगलबार आफ्नै कार्यालयमा पत्रकार सम्मेलन गरेर रोजगारदाता देशले नरोकेसम्म वैदेशिक रोजगारमा पठाउने काम बन्द नगरिने जनाएको हो ।
पत्रकार सम्मेलनअघि संघले व्यवसायीहरूलाई छलफलमा बोलाएको थियो । सोही छलफलमा व्यवसायीहरूले रोजगारदाता कम्पनीहरूले अहिलेसम्म कामदार रोक्नेबारेमा केही नभनेकाले सम्बन्धित मुलुकले कामदार रोक्न नभनेसम्म आफूहरूले कामदार रोक्न नहुने बताएका छन् । छलफलमा व्यापसायी तथा संघका सदस्य केशव न्यौपानेले नेपालमा अहिलेसम्म कोरोना संक्रमित व्यक्ति फेला नपरे पनि सञ्चारमाध्यमले भने अफहवा फैलाएको भन्दै संयमित भएर सहयोग गर्न अपिल गरे ।
यसैबीच, विश्वमा बढ्दै गएको कोरोना भाइरस (कोभिड १९) भाइरसका कारण वैदेशिक रोजगारको क्षेत्रमा पनि प्रभाव पर्न थालेको छ । रोजगारदाता देशले कामदार लिन बन्द नगरेसम्म नेपाल सरकारले वैदेशिक रोजगार बन्द गर्न नहुने उपस्थित म्यानपावर व्यवसायीले बताएका छन् ।
यसैबीच, केही सञ्चारमाध्यमले भने रोजगारदाता मुलुकले नेपाली कामदारलाई रोक लगाएको समाचार सम्प्रेषण गरेको भन्दै संघका महासचिव सुजित श्रेष्ठले बिनाआधार समाचार लेखिएको भन्दै दुःख व्यक्त गरेका छन् । उनले संघको आधिकारिक धारणा सार्वजनिक गर्दै रोजगारदाता देशले कामदार लिन बन्द नगरेसम्म नेपाल सरकारले हतारमा वैदेशिक रोजगार बन्द गर्न आवश्यक नभएको बताए । उनले कोरोना भाइरसलाई जोडेर यथार्थभन्दा हल्ला बढी चलाइएकाले गन्तब्य मुलुकले कामदार नपठाउनू नभनेसम्म नेपालले कामदार पठाउन रोक्न नहुने पक्षमा संघ रहेको जानकारी दिए ।
यसैबीच, कुवेत सरकारले भने आफ्नो मुलुकमा प्रवेश गर्ने सबै प्रकारका भिसा रोकिसकेको छ । कोरोना भाइरस संक्रमणको जोखिम बढेसँगै कुवेतले नेपाली कामदारको प्रमुख गन्तब्य मध्येको एक कुवेतले तत्कालका लागि सबै प्रकारका भिसामा रोक लगाएको हो । त्यसो त कुवेत सरकारले नेपाललगायत अन्य देशलाई पनि भिसाको प्रक्रियामा रोक लगाएको महासचिव श्रेष्ठले जानकारी दिए । अन्य खाडी मुलुकहरूमा पनि कोरोनाको संक्रमण देखिएको भए पनि कुवेतले सबै देशबाट ल्याउने कामदारको भिसामा रोक लगाएको उनले बताए ।
त्यस्तै, संघका अध्यक्ष विष्णुप्रसाद गैरेले अहिलेको अवस्थालाई हेर्दा वैदेशिक रोजगारीमा जाने कामदारको भिसा पठाउन नसकिने अवस्था नरहेको बताएका छन् । सरकारमा रहेका सदस्यहरूबीच नै आ–आफ्नो धारण आएपछि व्यावसायी अन्योलमा रहेको भन्दै यसका लागि सबै सरकारी निकायहरूको एउटै धारणा हुनुपर्ने उनले बताए ।
रोजगारदाताले सम्बन्धित देशमा कोरोनाको जोखिम छैन भनेको अवस्थामा नेपाली कामदारमा रोक्नु नहुने भन्दै यस विषयमा श्रम मन्त्रालय, स्वास्थ्य मन्त्रालय, परराष्ट्र मन्त्रालयको निर्णयअनुसार टुंगो लाग्ने उनले बताएका छन् ।
यता नेपाल सरकारले दक्षिण कोरियामा जाने कामदारलाई पनि तत्कालका लागि रोक्ने निर्णय गरिसकेको छ । दक्षिण कोरियामा पनि कोरोना संक्रमणमा देखिएको वृद्धिसँगै रोजगारीका लागि त्यहाँ जान लागेका नेपाली युवालाई तत्काल पठाउन रोक लगाइसकिएको छ ।
वैदेशिक रोजगार विभागले वैदेशिक रोजगारीमा जाने कामदारको श्रम स्विकृति मंगलबार रोकेको छैन । कोरोना प्रभावित देशमा जाने कामदारका लागि श्रम स्वीकृति दिने कार्य स्थगित भन्दै विभिन्न सञ्चारमाध्यममा समाचार सम्प्रेषण भएपछि ताहचल कार्यालयले श्रम स्विकृति नरोकिएको बताएको हो ।
