धादिङ– वैदेशिक रोजगारमा हुने ठगी न्यूनीकरणका लागि प्रहरीले सक्दो सहयोग गर्ने धादिङका डिएसपी रूपक खड्काले बताएका छन् । सोमबार श्रम रोजगार तथा सामाजिक सुरक्षा मन्त्रालय र सामी हेल्भेटास स्विस इन्टरकोअपरेसन नेपालको साझेदारीमा नीलकण्ठ नगरपालिकाद्वारा आयोजित वैदेशिक रोजगारीलाई सुरक्षित र भरपर्दो बनाउन गरिएको प्रहरीसँग अन्तक्र्रिया कार्यक्रममा उनले यस्तो बताएका हुन् ।
वैदेशिक रोजगारीमा हुने ठगी र मानव बेचबिखनको समस्या न्यूनिकरणका लागि प्रहरीले सक्दो सहयोग गर्ने उनले प्रतिबद्धता व्यक्त गरेका छन् ।
वैदेशिक रोजगारीमा देखिएका समस्या न्यूनीकरण गर्न र वैदेशिक रोजगारीलाई सुरक्षित बनाउन प्रहरीसँग अन्तक्र्रिया कार्यक्रम सम्पन्न भएको सुरक्षित आप्रवासन सामी परियोजनाका लेखा अधिकृत सम्झना भण्डारीले कार्यक्रममा बताएका छन् । यस्तै सुरक्षित आप्रवासन सामी परियोजनाका कार्यक्रम अधिकृत कमलबहादुर रोकायाले वैदेशिक रोजगारीको क्रममा देखिएका समस्या, वैदेशिक रोजगार विभाग र प्रहरीसँग भएको सम्झौता अनुसार प्रहरीले खेल्नुपर्ने भूमिका र भविष्यमा सहयोग र सहकार्य कसरी गर्न सकिन्छ भन्ने विषयमा जानकारी गराए । कार्यक्रममा जिल्लाभरिका ४० जना प्रहरी चौकी इञ्चार्जको सहभागिता रहेको थियो ।
