काठमाडौं– मौरिससले नेपाली कामदारलाई निःशुल्क भिसा उपलब्ध गराउने तयारी गरेको समाचार छ । मौरिसस भ्रमणमा रहेका श्रम रोजगार तथा सामाजिक सुरक्षा मन्त्री रामेश्वर राय यादवलाई मौरिसस पक्षले नेपालीसँग कुनै शुल्क उठाउन नपाउने गरी तयारी गरिरहेको बताएपछि मौरिससले निःशुल्क भिसा उपलब्ध गराउने पूर्वानुमान गरिएको हो ।
शुक्रबार श्रममन्त्री यादव र मौरिससका श्रम मानव स्रोत विकास तथा तालिम मन्त्री सुदेश सत्कम कालिचरनसँग भएको भेटमा उनले मौरिसस आउने नेपाली कामदारसँग कुनै पनि किसिमको रकम असुल्न नपाउने गरी काम अघि बढाइनुपर्ने स्पष्ट सन्देश दिएको श्रम मन्त्रालयले जनाएको छ ।
मन्त्री कालिचरनले मर्यादित कामदार भर्ना प्रक्रिया (फेयर रिक्रुटमेन्ट) अपनाउन जोड दिएको श्रम मन्त्रालयका प्रवक्ता सुमन घिमिरेद्वारा जारी विज्ञप्तिमा उल्लेख गरिएको छ । त्यसो त नेपालसँग कामदार लिने भन्दै गत जुनमा श्रम समझदारी गरेको मौरिससले नेपाललाई कामदारसँग रकम नअसुल्न सुझाव दिएको छ ।
मर्यादित भर्ना प्रक्रियाका विभिन्न पक्षमध्ये कामदारसँग भर्ना शुल्क(रकम) असुल्नु मुख्य समस्या हो । यसलाई अन्तर्राष्ट्रिय जगतले श्रमिकमाथि हुने गम्भीर शोषणका रूपमा लिने गर्दछ ।
शुक्रबार भएको भेटका क्रममा दुई देशवीच गत जुनमा सम्पन्न भएको श्रम समझदारीको प्रभावकारी कार्यान्वयका लागि दुवै पक्षवाट निरन्तर सहकार्य गर्दै जाने बारेमा घनिभूत छलफल भएको विज्ञप्तिमा उल्लेख छ । सो छलफल पश्चात द्विपक्षीय समझदारी अनुरूपको संयुक्त कार्य समूहको वैठक बसेको थियो । उक्त अवसरमा सम्झौता अनुरूपको मर्यादित कामदार भर्नासँग सम्बन्धित सबै प्रक्रियाहरूका बिषयमा तथा सोसँग सम्वन्धित लागतहरूको बिषयमा समेत विस्तृत छलफल भएको जनाइएको छ ।
मन्त्रीस्तरीय टोलीको मौरिसस भ्रमणका बारेमा मन्त्रालयका तर्फबाट जारी विज्ञप्तिमा मौरिससस्थित रोजगारदाताहरूको संगठनका प्रमुख तथ प्रतिनिधिहरूसँग विदेशी कामदारको माग रहेका पूर्वाधार, होटल, उत्पादन, सुरक्षा, सेवा लगायतका क्षेत्रहरूका विषयमा विस्तृत छलफल भएको जनाइएको छ । यसैगरी मन्त्री यादव तथा मौरिससका कृषि, उद्योग तथा खाद्य सुरक्षा मन्त्री महेन् कुमार सिरुतनसँग कुराकानी भएको र सो क्रममा मौरिससको कृषि क्षेत्रमा नेपाली कामदारहरूको लागि रोजगारीको सम्भावनाका बारेमा कुराकानी भएको श्रम मन्त्रालयले जनाएको छ ।
-1745656903.jpeg)