काठमाडौं– नेपाल वैदेशिक रोजगार व्यवसायी संघले संयुक्त अरब इमिरेट्स (युएई)मा वैदेशिक रोजगारसम्बन्धी मेला ‘युएई जब फेयर’ गर्ने निश्चित भएको छ । संघका अनुसार आगामी मार्च २ अर्थात् फागुन १९ गते मेला आयोजना गर्ने निश्चित भएको हो । संघले यसअघि अबुधाबी डाइलगको अवसर पारेर फेब्रुअरी १५ मा जब फेयर गर्ने निर्णय गरेको थियो । उक्त मिति परिवर्तन गरी मार्च २ लाई तय गरिएको हो ।
पूर्वतयारी नपुगेका कारण जब फेयरको मिति सार्नु परेको संघका महासचिव मेघनाथ भुर्तेलले बताए । ‘फागुन २ गते पुनः बैठक बसी संघले फागुन १९ मा युएईमा जब फेयर गर्ने निश्चित गरेको छ,’ उनले भने, ‘अब तोकिएकै मितिमा हुन्छ, त्यसका लागि हामीले विभिन्न समिति, उपसमिति बनाएर कार्य विभाजनसमेत गरिसकेका छौं ।’
वैदेशिक रोजगारीमा जाने कामदारहरुको हितलाई मध्यनजर गर्दै बिचौलिया निषेध गरी रोजगारदातासँग सीधा सम्पर्क स्थापित गर्ने उद्देश्यले रोजगार मेला गर्न लागिएको महासचिव भुर्तेलले बताए । मेला युएईस्थित होटल मरिनामा हुने उनले जानकारी दिए । युएईपछि युरोपमा पनि जब फेयर गर्ने संघको तयारी रहेको उनले बताए ।
‘संघमा निर्वाचित भएर आएदेखि नै कार्यसमितिले युरोप, मलेसिया र खाडी मुलुकमा वैदेशिक रोजगारसम्बन्धी मेला गर्ने योजना बनाएको थियो,’ महासचिव भुर्तेलले भने, ‘पहिलो मेला मलेसियामा गर्ने हाम्रो तयारी पनि थियो तर मलेसियामा कामदारको मागमा आएको कमीका कारण गन्तव्य बदलियो र युएईका लागि निश्चित ग¥यौं ।’ श्रम, रोजगार तथा सामाजिक सुरक्षा मन्त्रालय, वैदेशिक रोजगार बोर्ड सचिवालय र युएईस्थित नेपाली राजदूतावासको सहकार्यमा पहिलोपटक रोजगार मेला सञ्चालन गर्ने अवसर मिलेको भुर्तेलले बताए ।
मेलामा युएई सरकारका प्रतिनिधि, ठूला रोजगारदाता कम्पनी, सबै राज्यका चेम्बरहरु, भारतीय लगानी समूह, व्यवसायी समुदाय, एचआर एसोसियसन र आधिकारिक नेपाली चेम्बरलगायत विभिन्न व्यावसायिक संघसंगठनको सहभागिता रहने संघले जनाएको छ । संघले रोजगार मेलामा सहभागी हुन चाहने इजाजतपत्र प्राप्त व्यावसायिक संस्थाहरुको नामावली संकलन भइरहेको उल्लेख गर्दै छिटोभन्दा छिटो आफ्नो विवरण बुझाउन व्यवसायीहरुलाई आग्रह गरेको छ ।
संघले रोजगार मेलालाई भव्यरुपमा सफल बनाउन आवश्यक तयारीका लागि भन्दै दुई समिति र पाँच उपसमितिसमेत गठन गरेको छ । जसमा संघका वर्तमान अध्यक्ष, पूर्वअध्यक्षहरु, सम्पूर्ण शुभेच्छुक संघ संस्थाका अध्यक्षहरुको ‘सल्लाहकार समिति’ र संघका वरिष्ठ उपाध्यक्ष डिकबहादुर खत्री (कुमार)को संयोजकत्वमा द्वितीय उपाध्यक्ष सञ्जु गुरुङ सदस्य, तृतीय उपध्यक्ष रोशन कटुवाल सदस्य, सचिव कर्णराज कटुवाल सदस्य तथा महासचिव मेघनाथ भुर्तेल सदस्यसचिव रहनेगरी ‘मूल समिति’ बनाइएको छ ।
त्यस्तै कार्यविभाजनका क्रममा आर्थिक उपसमिति, प्रचारप्रसार उपसमिति, प्रेस छपाइ उपसमिति, भ्रमण व्यवस्थापन उपसमिति, आन्तरिक व्यवस्थापन उपसमिति गठन गरिएको पनि संघले जनाएको छ । आर्थिक उपसमितिमा कोषाध्यक्ष सरिता घले संयोजक, सोमबहादुर तामाङ र कैलाश पाठक सदस्य रहेका छन् । प्रचारप्रसार उपसमितिमा बैकुण्ठप्रसाद पौडेल संयोजक, विक्रम श्रेष्ठ र तोरणकुमार कार्की सदस्य छन् । यस्तै प्रेस छपाइ उपसमितिमा देवेन्द्रनारायण श्रेष्ठ संयोजक, अनिलकुमार राई र देउमान नेम्वाङ सदस्य छन् । भ्रमण व्यवस्थापन उपसमितिमा नारायण भुषाल संयोजक, आनन्द कोइराला र देविमाया थापा सदस्य छन् । यसैगरी आन्तरिक व्यवस्थापन उपसमितिमा राजेन्द्र बस्नेत संयोजक, चन्द्रबहादुर लिम्बू र सूर्यकुमार श्रेष्ठ सदस्य रहेका छन् । कोषाध्यक्ष घलेबाहेक उपसमितिमा रहेका सबैजना कार्यसमिति सदस्य हुन् ।
युएई नेपाली कामदारहरुको आकर्षक रोजगार गन्तव्यमध्येको एक हो । बढ्दो आप्रवासी कामदारको मागका कारण चालु आर्थिक वर्षको सुरुआतबाटै युएई नेपालीहरुको प्रमुख गन्तव्य बनेको वैदेशिक रोजगार विभागको तथ्यांकले देखाएको छ । चालु आवको सात महिनामा एक लाख दुई हजारभन्दा बढी नेपाली रोजगारीका लागि श्रम स्वीकृति लिएर युएई पुगेको तथ्यांक हालै वैदेशिक रोजगार विभागले सार्वजनिक गरेको छ ।
