काठमाडौं– वैदेशिक रोजगार विभाग, इपीएस कोरिया शाखाले रोजगार अनुमति प्रणाली (इपीएस) भाषा परीक्षाको मिति तय हुन अझै केही दिन लाग्ने जनाएको छ । शाखाले दक्षिण कोरियाको उत्पादनमुलक क्षेत्रमा जान लिइने भाषा परीक्षाको मिति यही माघ २२ गते सार्वजनिक गर्ने बताइए पनि बुधबार एक सूचना जारी गर्दै अझै केही समय लाग्ने उल्लेख गरेको छ ।
‘उत्पादनमूलक क्षेत्रतर्फको कोरियन भाषा परीक्षाबारे माघ २२ गते सूचना प्रकाशित गर्ने तय भएको थियो । तर, प्राविधिक कारणले गर्दा उल्लेखित मितिमा परीक्षाबारे विस्तृत विवरण सार्वजनिक गर्न नसकेका कारण केही दिनभित्रै पुनः सूचना जारी गर्ने व्यहोरा जानकारी गराइन्छ,’ सूचनामा भनिएको छ । शाखाले यसअघि गत मंसिर १९ गते सार्वजनिक गरेको सूचनाअनुसार कोरियाको उत्पादनमूलक क्षेत्रका लागि आवेदन दिएका परीक्षार्थीलाई परीक्षाबारे विस्तृत जानकारी माघ २२ मा प्रकाशित गर्ने बताएको थियो ।
ठूलो संख्यामा रहेका आवेदकहरुको विस्तृत विवरण रूजु गर्ने काम नसकिएकाले तोकिएको समयमा परीक्षा मिति सार्वजनिक गर्न नसकिएको शाखाकी निर्देशक मैयाँ कँडेलले बताइन् । ‘केही प्राविधिक कार्यहरु बाँकी रहेकाले परीक्षाको मिति तय गर्न थप समय लागेको हो,’ उनले भनिन्, ‘सबै तयारी पुरा गरेर केही दिनभित्रै परीक्षाको मिति सार्वजनिक गर्छौं ।’
ईपीएसमार्फत कोरियाको उत्पादनमुलक क्षेत्रमा जानका लागि १ लाख ६४ हजारभन्दा बढी परीक्षार्थीले भाषा परीक्षाको लागि आवेदन दिएका छन् । परीक्षार्थीको संख्या ठूलो भएकाले तीन चरणमा दैनिक पाँच सिफ्टमा परीक्षा सञ्चालन गर्ने इपीएस शाखाको तयारी छ ।
रोजगारीको लागि आकर्षक गन्तव्य मानिएको कोरियामा सरकारले जीटुजी सम्झौता अन्तर्गत सन् २००८ देखि आफैले श्रमिक पठाउँदै आएको छ । कोरियामा हालसम्म इपीएसमार्फत एक लाख १० हजारभन्दा बढी नेपाली पुगिसकेको सरकारी तथ्यांकले देखाएको छ भने अहिले ५० हजारको हाराहारीमा नेपालीहरु श्रम गरिरहेका छन् ।
कोरियाले उत्पादनमुलक र कृषि क्षेत्रमा नेपालीहरुलाई रोजगारीको अवसर दिंदै आएको छ । यसबाहेक पछिल्लो समय पानीजहाज निर्माण ‘शिप बिल्डिङ’मा पनि नेपाली श्रमिक लैजान सुरु गरेको छ । इपीएसमार्फत गत वर्षमात्रै २१ हजार भन्दाबढी नेपाली श्रमिक कोरिया गएको शाखाले जनाएको छ ।
