काठमाडौं– दक्षिण कोरियालाई पनि कोरोनाले आक्रमण गरेको छ । चीनको वुहान सहरबाट फैलिएको कोभिड १९ कोरोना भाइरस यतिबेला दक्षिण कोरियामा शुक्रबारसम्ममा १३ जनाको ज्यान लिएपछि दक्षिण कोरियामा सन्त्रास फैलिएको हो ।
तर, अहिलेसम्मको आँकडा अनुसार कोरियामा रहेका नेपालीहरू भने कोरोना संक्रमित नभएको बताइन्छ । यसैबीच, आप्रवासी कामदारलाई नयाँ काम खोज्न कोरियाले दुई महिनाको समय दिएको समाचार छ । कोरोना भाइरसको त्रासका कारण आफू कार्यरत कम्पनी छोडेर बसेका विदेशी कामदारलाई नयाँ कम्पनीमा काम खोज्न दक्षिण कोरियाली सरकारले दुई महिनाको समय दिएको हो ।
विदेशी कामदारले कम्पनी छोडेको वा काम खोज्दै गरेकाहरूलाई नयाँ कम्पनीमा आवद्ध हुन दुई महिनासम्मको भिसा थप गरिएकोे बताइन्छ । चीनको वुहान सहरबाट सुरु भएको कोरोना भाइरस दक्षिण कोरियामा पनि महामारीका रूप लिन थालेपछि कोरियाको न्याय मन्त्रालयले यस्तो निर्णय गरेको त्यहाँका सञ्चारमाध्यमले जनाएको छ ।
कोरिया रोग नियन्त्रण विभागका अनुसार वुहानबाट फर्किएका ५५ वर्षीय कोरियन नागरिकलाई पहिलोपटक यो भाइरस देखा परेको थियो । दक्षिण कोरियामा मात्र अहिलेसम्म २ हजार ३३७ जना कोरोना भाइरस संक्रमित छन् । २७ जना उपचारपछि निको भएर घर फर्किएका छन् । उपचारमा रहनेको संख्या २४ हजार ७५१ पुगेको छ । संक्रमित मध्ये ८० प्रतिशत नागरिक थेगु सहरका रहेको कोरियन समाचार संस्थाहरूले जनाएका छन् । थेगु सहरस्थित एक चर्चमा प्रार्थनाका लागि पुगेकी एक संक्रमित महिलाबाट कोरोना सरेको बताइएको छ । ती संक्रमित महिला पुगेको एक अस्पतालका कर्मचारीलाई समेत सो समयमा संक्रमण देखिएको कोरियाली रोग नियन्त्रण केन्द्रले जनाएको छ । कोरोनाको प्रभावका कारण अहिले बस, ट्रेन लगभग रित्तो अवस्थामा पुगेका छन् ।
