दोहा– चीनको वुहान सहरबाट फैलिएको कोरोनाको चपेटामा हाल कतारलगायत खाडी मुलुकहरू पनि आएका छन् । कतारमा पनि कोरोना भाइरसको संक्रमण देखिएको छ । कतारमा एकजना कोरोना भाइरसबाट संक्रमित भएको कतारको स्वास्थ्य मन्त्रालयले जनाएको छ ।
इरानबाट उद्धार गरिएका यात्रुमध्ये एक जना कतारी नागरिकमा कोरोना भाइरसको संक्रमण देखिएको मन्त्रलायले जनाएको छ । खाडी मुलुक तथा, दक्षिण कोरियामा कोरोनाले महामारीको रूप लिन थालेपछि त्यहाँ रहेका नेपालीहरूसमेत त्रासमा छन् ।
यद्यपि हालसम्म कुनै पनि नेपाली संक्रमित नभएको त्यहाँस्थित नेपाली दूताबासले जनाएको छ । कतारमा कोरोना संक्रमित देखापरेपछि कतारस्थित नेपाली दूताबासले एक सूचना जारी गर्दै नेपालीलाई सचेत रहन अनुरोध भने गरिसकेको छ । यस्तै खाडी मुलुकहरूस्थित नेपाली दूताबासहरूले पनि नेपालीहरूलाई सचेत रहन अपिल गरेको छ ।
