काठमाडौं– एजुकेसनल कन्सल्टेन्सी चलाएर वैदेशिक रोगजारीको धन्दा चलाउँदै ६ सयभन्दा बढी व्यक्तिबाट करोडौं रुपैयाँ ठगी गरेको आरोपमा एक जना पक्राउ परेका छन् । ललितपुरको कोन्ज्योसोम गाउँपालिका–४ घर भएका ३२ वर्षीय विकास वाइबा भनिने सुजन तामाङलाई प्रहरीले पक्राउ गरेको हो ।
बुधबार पुल्चोकबाट पक्राउ परेका तामाङलाई प्रारम्भिक अनुसन्धानपश्चात प्रहरीले बिहीबार सार्वजनिक गरेको हो । अनुसन्धानका क्रममा सुजनले नक्कली परिचय दिई एजुकेसन कन्सल्टेन्सी सञ्चालन गरी युरोपेली मुलुक माल्टा, पोल्यान्ड, क्रोएसिया र क्यानडालगायतका देशहरुमा पठाइदिन्छु भनी प्रलोभनमा पारी छ सयभन्दा बढी व्यक्तिबाट करोडौं रकम ठगी गरेको देखिएको काठमाडौं उपत्यका अपराध अनुसन्धान कार्यालयका प्रमुख तथा प्रहरी वरिष्ठ उपरीक्षक सोमेन्द्रसिंह राठौरले जानकारी दिए ।
प्रहरीले सार्वजनिक गरेको विवरणअनुसार तामाङले २०७३ सालबाट अयुष म्यानपावरलगायत विभिन्न मेनपावरमा एजेन्टका रुपमा करिब पाँच वर्ष खाडी तथा मलेसियामा नेपाली कामदार पठाउने काम गर्थे भने २०७७ सालमा ठगी तथा अपराधिक लाभसम्बन्धी कसुर मुद्दामा फरार रही नेपाल तथा भारतको विभिन्न स्थानमा लुकीछिपी बसेको देखिएको छ । तत्पश्चात आफ्नो परिचय बदलेर २०८० वैशाखदेखि विकास वाइवाको नामबाट बालाजुमा युरो विङ्स एजुकेसन कन्सल्टेन्सी सञ्चालन गर्दै आएको पनि अनुसन्धानबाट खुलेको प्रहरीले जनाएको छ । सोही कन्सल्टेन्सीबाट उनले ठगी धन्दा चलाएको भेटिएको छ ।
तामाङले सरकारी निकायका कर्मचारीलाई समेत ठगी गर्न सफल भएको देखिएको छ । उनले सरकारी कर्मचारीलाई युरोप पठाउने भनी रकम लिई नक्कली भिसा देखाई जागिर छाड्न लगाएको पनि प्रहरीले उल्लेख गरेको छ । साथै विकास वाइबाको नामबाट बैंक खाता खोली आफैले हस्ताक्षर गरी बैंक तथा वित्तिय संस्थामार्फत आर्थिक कारोबार गर्ने गरेको अनुसन्धानबाट खुलेको प्रहरीले जानकारी दिएको छ ।
यस्तै वैदेशिक रोजगारीको लागि तामाङले युरोपेली मुलुकमा पठाइदिने भन्दै माल्टाका लागि आठ लाख रुपैयाँ, पोल्यान्डका लागि सात लाख रुपैयाँ, क्रोएसियाका लागि छ लाख ५० हजार रुपैयाँ र क्यानडाका लागि १८ लाख रुपैयाँका दरले ठगी गरेको फेला परेको प्रहरी नायव उपरीक्षक अनिल घिमिरेले जानकारी दिए । तामाङले छ सयभन्दा बढी व्यक्तिसँग न्युनतम ५० हजारदेखि पाँच लाख रुपैयाँसम्म रकम लिएको देखिएको छ ।
ठगी गरेको रकमबाट चार करोड रुपैयाँ व्यक्तिगत ऋण तिरेको, राप्ती म्यानपावरको ५० प्रतिशत शेयर खरिद गरेको, हुन्डाईको क्रेटा गाडी खरिद गरेको, भाइको खातामा १५ लाख ५० हजार रुपैयाँ जम्मा गरेको, जलविद्युत सहकारी संस्थाबाट लिएको १५ लाख रुपैयाँ ऋण तिरेको तथा पाँच लाख रुपैयाँको सुनको ब्रास्लेट खरिद गरेको विवरणसमेत काठमाडौं उपत्यका अपराध अनुसन्धान कार्यालयले सार्वजनिक गरेको छ ।
वैदेशिक रोजगार विभागका अनुसार हालसम्म ७० जनाको मुद्दा दर्ता भई तीन करोड २५ लाख २२ हजार रुपैयाँ बिगो देखिन आएको छ । लामो समयदेखि फरार रहेका तामाङलाई थप अनुसन्धान तथा कारवाहीको लागि विभाग ताहचलमा बुझाइएको प्रहरी उपरीक्षक रविन्द्र रेग्मीले जानकारी दिए ।
-1745656903.jpeg)