काठमाडौं– दक्षिण कोरियाले नेपालबाट मासिक तीन लाख रुपैयाँ पारिश्रमिक दिनेगरी कामदार लैजाने प्रस्ताव गरेको श्रम, रोजगार तथा सामाजिक सुरक्षा मन्त्रालयले जनाएको छ । नेपाल र कोरियाबीच कूटनीतिक सम्बन्ध स्थापना भएको ५०औं वार्षिकोत्सवको अवसर पारेर मंगलबार राजधानीमा आयोजित कार्यक्रममा कोरियाले आगामी दिनमा तीन लाख रुपैयाँभन्दा बढी परिश्रमिक दिएर श्रमिक लैजाने प्रस्ताव गरेको श्रमसचिव केवलप्रसाद भण्डारीले जानकारी दिएका हुन् ।
रोजगार अनुमति प्रणाली (इपिएस)मार्फत हाल कोरियामा हजारौंको संख्यामा नेपाली श्रमिकले काम गरिरहेको सन्दर्भमा थप पारिश्रमिकसहित श्रमिक लैजाने प्रस्ताव आएको उनको भनाइ छ । यसका लागि मन्त्रालयले कार्यविधि बनाइरहेको पनि सचिव भण्डारीले उल्लेख गरे ।
हाल कोरिया जाने श्रमिकहरुले मासिक दुई लाख रूपैयाँसम्म पारिश्रमिक पाइरहेको अवस्था छ,’ उनले भने, ‘उहाँहरुले (कोरियाली प्रतिनिधि) मासिक तीन लाख रूपैयाँभन्दा माथि पारिश्रमिक दिने गरेर नेपालबाट कामदार लैजाने प्रस्ताव गर्नुभएको छ, यसलाई कार्यान्वयनमा लौजानका लागि कार्यविधि बनाइरहेका छौं ।’
कोरियाले कुन क्षेत्रको श्रमिकका लागि तीन लाख रुपैयाँ परिश्रमिक दिने प्रस्ताव गरेको भन्नेबारे भने उनले खुलाएनन् । सचिव भण्डारीले मैत्रीपूर्ण सम्बन्धका कारण कोरियामा नेपालीले रोजगारीको अवसर पाएको बताए । ‘कोरिया सरकारले नेपालीलाई रोजगारीका क्षेत्रमा दिएको प्राथमिकता अतुलनीय छ,’ उनले भने, ‘नेपालीले कोरियामा रोजगारीमात्र नभई त्यहाँ आर्जन गरेको सीप, अनुभव, ज्ञान र पुँजी पनि स्वदेशमा उपयोग हुनेमा विश्वस्त छु ।’ उनले कोरिया सरकारले नेपालको विकास निर्माणका क्षेत्रमा गरेको योगदानले दुई देशबीच आत्मीय र भाइचाराको सम्बन्ध विस्तार भएको बताए ।
यस्तै नेपालका लागि कोरियाली राजदूत पार्क टि योङले दुई मुलुकबीचको ५० वर्षे सम्बन्धलाई संयुक्त समृद्धिका लागि अनुकूल हुनेगरी आगामी दिनमा थप मजबुत बनाउनुपर्नेमा जोड दिए । यति लामो यात्राले द्विपक्षीय सम्बन्ध फस्टाउँदै गएको र बलियो बन्धन बनाएको उल्लेख गर्दै उनले कोरिया र नेपालबीचको सहकार्य व्यक्तिगत र आर्थिक विकासका लागि अत्यन्तै उत्प्रेरक भएको बताए ।
हाम्रो सम्बन्ध जनस्तरमा पनि बलियो छ, थुप्रै नेपालीहरु कोरियामा काम गरिरहेका छन्,’ राजदूत पार्कले भने, ‘उनीहरु कोरियाली रोजगारदाताको विश्वास जित्न सफल भएका छन् ।’ रोजगारीका क्षेत्रमा आप्रवासी श्रमिकको माग बढ्दै गएका कारण पछिल्लो समय नेपालबाट इपिएसमार्फत जाने नेपालीको संख्यामा पनि वृद्धि भएको राजदूत पार्कले बताए ।
उक्त कार्यक्रममा दक्षिण कोरियाबाट फर्किएर स्वदेशमा उद्यम गरिरहेका व्यक्तिहरुको कथामा आधारित ‘तपाईं पनि मालिक बन्न सक्नुहुन्छ’ पुस्तकको अनावरणसमेत गरिएको छ । कोरियाले नेपालबाट उत्पादनमूलक र कृषि क्षेत्रमा नेपाली श्रमिक लैजाँदै आएकोमा पछिल्लो सयम सिप बिल्डिङ क्षेत्रमा पनि इपिएसमार्फत श्रमिक लैजान सुरु गरेको छ । साथै, कोरिया रोजगारीबाट फर्किएका श्रमिकहरुलाई उद्यमशीलता प्रवद्र्धन गर्ने उद्देश्यले सञ्चालित पुनःएकीकरण कार्यक्रमलाई पनि सहयोग गर्ने प्रतिबद्धता जनाएको छ ।
