काठमाडौं - वैदेशिक रोजगारीको लागि अजरबैजान र कुवेत पठाइदिन्छु भन्दै विभिन्न व्यक्तिसँग रकम ठगी गर्ने दुई जना पक्राउ परेका छन् । उक्त मुलुकमा आकर्षक तलबसहितको रोजगारी लगाइदिने भन्दै पीडितसँग रकम लिएर फरार रहेको आरोपमा हरिकुमार दाहाल र दिपेन्द्रकुमार राउतलाई प्रहरीले पक्राउ गरेको हो ।
खोटाङको दिक्तेल रुपाकोट मझुवागढी गाउँपालिका– ६ घर भई काठमाडौं बुढानिलकण्ठ बस्ने ५१ वर्षीय दाहालले खेमबहादुर डाँगीलाई अजरबैजान पठाई प्रतिष्ठित होटलमा मासिक ७५ हजार रूपैयाँ तलबमा काम लगाइदिन्छु भन्दै प्रलोभनमा पारी पटक पटक गरी ६ लाख ७७ हजार रुपैयाँ ठगी गरेको अनुसन्धानबाट खुल्न आएको प्रहरीले जनाएको छ । उनलाई खोजतालासका क्रममा बुढानिलकण्ठबाटै पक्राउ गरिएको बताइएको छ ।
त्यस्तै धनुषाको धनुषाधाम नगरपालिका– ५ घर भई हाल ललितपुर टिकाथली बस्ने २० वर्षीय राउतले अजय कुमार साहलाई कुवेत पठाई एक प्रतिष्ठित होटलमा मासिक ६५ हजार रूपैयाँ तलबमा काम लगाइदिन्छु भन्दै प्रलोभनमा पारी पटक पटक गरी तीन लाख रूपैयाँ ठगी गरेको खुल्न आएको छ । उनलाई खोजतालसको क्रममा टिकाथलीबाटै पक्राउ गरिएको प्रहरीले जनाएको छ ।
पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरुलाई थप अनुसन्धान तथा कारबाहीका लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
-1745656903.jpeg)