काठमाडौं– श्रम, रोजगार तथा सामाजिक सुरक्षा मन्त्री रामेश्वर राय यादव मौरिसस् जाँदै छन् । गत वर्ष नै नेपाल र मौरिससबीच श्रम समझदारीपत्रमा हस्ताक्षर भए पनि नेपाली कामदार मौरिसस् जान नसकेपछि यसबारे छलफल गर्नका लागि मन्त्री यादव मंगलबार मौरिसस् जाने भएका हुन् ।
नेपाली कामदारहरूका लागि वैदेशिक रोजगार भन्नु नै खाडी र मलेसिया मात्र भएकाले सरकारले नयाँ श्रम गन्तव्यको खोजी गर्न थालेको छ । मन्त्री यादवका साथमा श्रमसचिव विनोद केसीसहित उच्चस्तरीय कार्यदलका पदाधिकारी मंगलवारदेखि एक साताका लागि मौरिसस जाने भएका हुन् ।
गत वर्ष स्विटजरल्यान्डको जेनेभामा अन्तर्राष्ट्रिय श्रम संगठनको कार्यक्रममा तत्कालिन श्रममन्त्री गोकर्ण बिष्ट र मौरिससका श्रम, औद्योगिक सम्बन्ध, रोजगार तथा तालीममन्त्री सुदेश एस क्यालीचर्नले गत जुनमा समझदारीपत्रमा हस्ताक्षर गरेका थिए । नेपाल र मौरिसस्बीच श्रम समझदारी भए पनि नेपाली कामदार मौरिसस्मा धेरै कामदार जान सकेका छैनन् । सम्झौतापश्चात् औंलामा गन्न सकिने गरी नेपाली कामदार मौरिसस् जान सकेका छन् ।
गत वर्ष सम्पन्न श्रम समझदारीमा नेपाली श्रमिकलाई मौरिससका नागरिकको न्यूनतम ज्याला भन्दा कम नहुने गरी तलब सुविधा उपलब्ध गराउनु पर्ने, कुनै पनि कामदारलाई ज्याला, ओभरटाइम भत्ता, कार्य वातारण र न्यायमा पहुँचजस्ता विषयमा विभेद गर्न नपाइने र मौरिससका रोजगारदाता र नेपालका रोजगार व्यवसायी बीचको प्रत्यक्ष समन्वयमा कामदारलाई पठाउने व्यवस्था गर्नेलगायत विषय समझदारीमा उल्लेख छ ।
-1745656903.jpeg)