काठमाडौं- संयुक्त अरब इमिरेट्स (युएई)का लागि नवनियुक्त राजदूत तेजबहादुर क्षेत्रीले नेपाली श्रमिकहरुको समस्या समाधानका लागि युएईमा रहेका विभिन्न नेपाली संघसंस्थासँग समन्वय एवं सहकार्य गर्ने बताएका छन् । दूतावासले विभिन्न संघसंस्थाका प्रतिनिधिहरुसँग आइतबार आयोजना गरेको भेटघाट तथा अन्तरक्रिया कार्यक्रममा राजदूत क्षेत्रीले उक्त कुरा बताएका हुन् ।
उनले परिणाममुखी कार्यका लागि राजदूतावास र नेपाली समाजको सहकार्य अनिवार्य रहेको उल्लेख गर्दै ती कार्यमा एकजुट भएर लाग्नुपर्ने धारणा व्यक्त गरे । ‘हामी सबैले एक अर्कासँग हातेमालो गरेर अगाडि बढ्न सके चाहेजस्तो परिणाम ल्याउन सक्छौं,’ राजदूत क्षेत्रीले भने, ‘यहाँ रहेका श्रमिकहरूको समस्या समाधान तथा समृद्ध नेपाल निर्माणको लागि द्विपक्षीय व्यापार, वैदेशिक लगानीजस्ता विषयमा काम गर्न समन्वय एवं सहकार्य आवश्यक छ ।’ उनले दूतावासको सेवालाई थप प्रविधिमैत्री, सेवाग्राहीको सहज पहुँच र चुस्तदुरुस्त बनाउन पनि दूतावास प्रतिबद्ध रहेको बताए ।
राजदूत क्षेत्री आफ्नो कार्यभार सम्हाल्न यही असोज ११ गते युएई पुगेका हुन् । कार्यक्रममा नियोग उपप्रमुख विशाल भट्टराईले श्रमिकहरुको समस्यालगायत अन्य विषयमा देखिएको अन्योलता हटाउन युएई सरकारसँग समन्वय गर्ने, औपचारिक माध्यमबाट रेमिट्यान्स पठाउन पहल गर्ने, जनचेतनामूलक कार्यक्रम गर्ने, राहदानी नवीकरणलाई थप सहज बनाउन लगायतका कार्यहरूमा नेपाली समुदायसँग सहकार्य गर्दै आएको उल्लेख गर्दै आगामी दिनमा पनि सहकार्य जारी रहने बताए ।
यसैगरी लेबर काउन्सेलर दीनबन्धु सुवेदीले नेपाली श्रमिकको समस्या समाधान तथा गुनासो व्यवस्थापन, श्रमिकको हकहितको सुरक्षाका लागि युएईको कानुनी व्यवस्था आकर्षित हुने भएकाले प्रक्रियागत रूपमा केही कठिनाइ भए पनि दूतावासले सदैव सक्रिय भएर काम गर्दै आएको जानकारी गराए । कार्यक्रममा सहभागीहरूले भिजिट भिसामा आएका नेपालीहरुलाई अलपत्र पार्ने, विभिन्न अस्पतालमा रहेकाहरुलाई सहज उपचारको व्यवस्था नहुनु र नेपालीले नै नेपालीलाई दुःख दिनेजस्ता समस्या विद्यमान रहेको जनाउँदै तत्काल समस्या समाधानका लागि पहल गर्न सुझाव दिएको दूतावासले जनाएको छ ।
-1745656903.jpeg)