काठमाडौं– वैदेशिक रोजगार बोर्ड सचिवालयले सञ्चालनमा ल्याएको टेलिमेडिसिन सेवाले विदेशमा गैरकानुनी रुपमा रहेका नेपाली कामदारहरु लाभान्वित भएको बताइएको छ । रोजगारीका क्रममा विभिन्न कारणले गैरकानुनी रुपमा गन्तव्य मुलुकमा नै बस्न बाध्य भएका कामदारले आफ्नो स्वास्थ्य समस्या हल गर्न तथा उपचारका लागि परामर्श लिन टेलिमेडिसिन भरपर्दो माध्यम भएको बोर्डले जनाएको छ ।
वैदेशिक रोजगारीमा गएका कामदारहरुलाई लक्षित गर्दै बोर्डले सञ्चालन गरेको टेलिमेडिसिन सेवा लिनेमा बढीजसो गैरकानुनी रूपमा काम गरिरहेका कामदार रहेको बोर्डका निर्देशक एवं सूचना अधिकारी राजन पौडेलले बताए ।
‘गैरकानुनी अवस्थामा रहेका कामदारहरुलाई आफ्नो स्वास्थ्यसम्बन्धी समस्या र जिज्ञासा राख्न टेलिमेडिसिन सेवा सजिलो र प्रभावकारी माध्यम बन्दै गएको छ,’ उनले भने, ‘गैरकानुनी अवस्थामा रहेकाहरुलाई विदेशमा अस्पताल जान वा डाक्टरसँग प्रत्यक्ष भेटघाट गर्न सहज नहुने र बाहिर कतै निस्किए पक्राउ पर्ने डर हुने हुँदा टेलिमेडिसिन सेवा नै अहिले भरपर्दो देखिएको छ ।’ यो सेवा सञ्चालन गरेयता विदेशमा गैरकानुनी रुपमा काम गरिरहेका कामदारको संख्या अनुमान गरेभन्दा बढी रहेको जानकारी पाएको निर्देशक पौडेलले बताए ।
विदेशमा थप अवसर र कमाइको लोभमा कम्पनी छाडेका, भिसा अवधि सकिएका वा अन्य विभिन्न कारणले थुप्रै नेपालीहरु गैरकानुनी हैसियतमा पुग्ने गरेको उनले बताए । यस्तो अवस्थाका कामदारहरुलाई फोन तथा भिडियो कलमार्फत दिइने टेलिमेडिसिन सेवा अझ महŒवपूर्ण र प्रभावकारी हुने देखिएको पौडेलले जानकारी दिए । तर, सेवा दिने क्रममा गैरकानुनी रुपमा रहेका कामदारको भने छुट्टै विवरण नराखिएको उनले बताए । लुकीछिपी काम गरिरहेका कामदारलाई स्वास्थ्यमा कुनै समस्या वा अप्ठेरो परे अस्पतालसम्म पुग्न र उपचार गराउन कठिनाइ हुने अवस्थामा राहत दिएको बोर्डले जनाएको छ ।
गत वर्ष चैत १५ गतेबाट बोर्ड र वीर अस्पतालबीच भएको सम्झौताअनुसार सुरु गरिएको सेवामार्फत अहिलेसम्म एक हजार २०० भन्दा बढी कामदारले स्वास्थ्य समस्यासम्बन्धी सेवा लिएको बोर्डले जनाएको छ । जसमा १०० भन्दा बढीले विशेषज्ञ सेवा लिएको बताइएको छ । टेलिमेडिसिन सेवाका लागि दैनिक सरदर २५ देखि ३० जनाले सम्पर्क गर्ने गरेको बोर्डले उल्लेख गरेको छ ।
साथै, बोर्डले यसै आर्थिक वर्षदेखि वैदेशिक रोजगारीमा रहेका कामदारलाई मनोपरामर्श सेवा दिने तयारी गरिरहेको जनाएको छ । यसका लागि बोर्डले एक जना मनोपरामर्शदाता खटाउने र विदेशमा रहेका श्रमिकलाई फोन तथा अन्य माध्यममार्फत मनोपरामर्श प्रदान गर्ने बताइएको छ ।
