काठमाडौं– वैदेशिक रोजगार बोर्डको सचिवालयले गत आर्थिक वर्ष २०७९÷८० मा वैदेशिक रोजगारीका लागि विदेश जान चाहने झण्डै १० हजार जनालाई निःशुल्क सीपमूलक तालिम दिएको छ । बोर्ड सचिवालयले सार्वजनिक गरेको मुख्य कार्यप्रगति विवरणअनुसार गत आवमा नौ हजार ७०३ जनाले निःशुल्क सीप तालिम लिएका हुन् ।
बोर्डले ४९६ जनालाई आवासीय सुविधासहित निःशुल्क सीप विकास तालिम प्रदान गरेको जनाएको छ । त्यसैगरी वैदेशिक रोजगारबाट फर्किएका कामदारलाई पुनःएकीकरण कार्यक्रमको माध्यमबाट सम्झौता भएकामध्ये ६८ वटा स्थानीय तहसँग समन्वय कार्यक्रम सम्पन्न भएको उल्लेख छ । जसबाट दुई हजार ६१० जना लाभान्वित भएको प्रतिवेदनमा उल्लेख छ ।
यस्तै गत चैत्र १५ गतेदेखि सञ्चालनमा आएको टेलिमेडिसिन सेवाबाट ९३७ जनाले सेवा लिएका छन् । टेलिमेडिसिन सेवा लिनेमा मलेसियाबाट २७५, साउदी अरेबियाबाट २२७, कतारबाट १०४, युएईबाट ९७, कुवेतबाट ७१, कोरियाबाट ५७, जापानबाट १९, पोर्चुगलबाट ११, रोमानियाबाट ११ र अन्य मुलुकबाट ६५ जना नेपाली कामदार रहेको बोर्डले जनाएको छ ।
आर्थिक सहायतामा साढे ६५ करोड खर्च
बोर्डले गत आवमा अनिवार्य दायित्वतर्फ गरेको खर्च विवरण पनि मुख्य कार्यप्रगति विवरणमा समेटेको छ । वैदेशिक रोजगारीको क्रममा गत आवमा एक हजार २०८ जनाको मृत्यु भएको उल्लेख गरिएको छ । जसमा महिलाको संख्या ४५ रहेको छ । मृत्युपश्चात् कामदारको परिवारलाई दिइने आर्थिक सहायतास्वरुप ६५ करोड ५१ लाख ८० हजार रुपैयाँ खर्च भएको छ । अंगभंग वा बिरामी भएका ३८९ जना कामदारलाई नौ करोड ९७ लाख आठ हजार रुपैयाँ उपलब्ध गराइएको बोर्डले जनाएको छ ।
बोर्डले वैदेशिक रोजगारीमा रहेका व्यक्तिको परिवारका ११२ सदस्यलाई स्वास्थ्य उपचार खर्चस्वरुप ६५ लाख रुपैयाँ र बालबच्चाहरुलाई छात्रवृत्ति सहायताबापत दुई हजार ९५६ जनालाई दुई करोड ८२ लाख दुई हजार रुपैयाँ प्रदान गरेको छ । विदेशमा मृत्यु भएका ८१८ जना कामदारको शव व्यवस्थापनमा (शव ढुवानी मात्र) दुई करोड ८५ लाख ८० हजार रुपैयाँ र ३१२ शव नेपाल झिकाउन सम्बन्धित नियोगसँग समन्वय गर्दा दुई करोड ६० लाख ७५ हजार रुपैयाँ खर्च भएको उल्लेख छ ।
त्यस्तै रोजगारीको क्रममा विदेशमा अलपत्र परेका वा बेपत्ता भएका १६७ कामदारको उद्धार तथा खोजतलासका लागि ४३ लाख १० हजार रुपैयाँ खर्च भएको छ । वैदेशिक रोजगारीमा जाने ५०७ जना महिला कामदारलाई अभिमुखीकरण तालिमबापतको शोधभर्ना रकम तीन लाख ५४ हजार ९०० रुपैयाँ उपलब्ध गराइएको बोर्डले जनाएको छ ।
