अमेरिका– गैरआवासीय नेपाली संघ (एनआरएनए) को आगामी कार्यकालका लागि अध्यक्ष पदका प्रत्यासी राजेन्द्रकुमार शर्माले विदेशमा रहेका नेपालीहरुलाई स्वदेशमै उद्यमी बनाउने योजना सार्वजनिक गरेका छन् ।
एनआरएनए अमेरिकाको बाल्टिमोर च्याप्टरले आयोजना गरेको अन्तरक्रिया कार्यक्रमलाई सम्बोधन गर्दै शर्माले विदेशमा श्रम गरिरहेका लाखौं नेपालीलाई सके उद्यमी बनाउने नसके उनीहरुको आर्थिक अवस्था सुधार गर्न सामूहिक रुपमा नेपाल सरकारलाई ग्यारेण्टी हुनेगरी लगानी गरेर उनीहरुको आर्थिक अवस्था र भविष्यको सुनिश्चितता गर्ने बताए ।
अहिलेसम्म विदेशमा मिहेनत गरेर केही व्यक्ति उद्यमी बन्न सक्नु पनि ठूलो उपलब्धि भएको उनको भनाइ छ । ‘विदेशमा रहेका लाखौं नेपाली दाजुभाइ दिदीबहिनीलाई सके उद्यमी बनाउने नसके उनीहरुको आर्थिक अवस्थालाई उनीहरुले नै दुःख गरेर कमाएको रकमबाट समुन्नत गराउन सामूहिक लगानी र प्राधिकरणमार्फत सरकारलाई ग्यारेण्टी राखेर सरकारलाई पनि फाइदा पुग्ने र उनीहरुको भविष्य सुरक्षित रहने गरी योजना बनाउन ढिला भइसकेको छ, अबको पहिलो आवश्यकता नै यही हो,’ शर्माले भने ।
वर्तमान कार्यसमितिमा उपाध्यक्ष रहेका शर्माले आगामी अक्टोबरमा हुन लागेको गैरआवासीय नेपाली संघ अन्तर्राष्ट्रिय समन्वय परिषद् (एनआरएनए आइसिसी)को ११औं महाधिवेशन तथा विश्व सम्मेलनबाट आगामी कार्यकालका लागि अध्यक्ष पदमा उमेदवारी दिएका हुन् । जापान, कोरिया, हङकङ, क्यानडापछि अमेरिकाको स्थलगत भेटघाट कार्यक्रममा पुगेका शर्माले भ्रमणबाट आफू उत्साहित भएको बताए ।
उनले आफ्नो नेतृत्वलाई विश्वले स्वीकारेको दाबीसमेत गरे । एनआरएनएलाई आमूल परिवर्तन गराउने उद्देश्यका साथ आफू यस अभियानमा लागेको उनले बताए ।
