काठमाडौं– केही दिनयता दक्षिण कोरियामा कोरोना भाइरसको आक्रमण बढ्दै गएपछि सिओलस्थित नेपाली राजदूताबासले सावधानी अपनाउन नेपालीहरूहरूलाई आग्रह गरेको छ । आइतबार राजदूताबासले प्रेस विज्ञप्ति जारी गरी हाल सबैभन्दा धेरै संख्यामा संक्रमितहरू देखापरेका थेगु तथा आसपासका क्षेत्रमा रहेका नेपाली विद्यार्थी, अन्य पेसा, व्यवसाय र श्रम गरी बसेका नेपालीहरूलाई विशेष सावधानी अपनाउन राजदूताबासले अनुरोध गरेको हो ।
गणतन्त्र कोरियामा पनि सिमित संख्यामा कोरोना भाइरसको संक्रमण देखिएकामा केही दिन अघिबाट यो फैलिँदै गएको छ । संक्रमितको संख्या बढ्दै गएपछि कोरियामा पनि फैलन थालेपछि त्यहाँ कार्यरत नेपालीलाई सावधानी अपनाउन नेपाली दूताबासले आग्रह गरेको छ ।
दक्षिण कोरियाली सञ्चार माध्यमबाट प्रकाशित समाचारहरूमा जनाइएअनुसार २२ फेब्रुअरी २०२० (१० फागुन ०७४) सम्म दक्षिण कोरियामा कोरोना संक्रमितहरूको संख्या चार सय नाघिसकेको छ । सम्बद्ध निकायहरूबाट हुँदै आएका नियन्त्रण र रोकथामका सशक्त प्रयासहरूका बावजुद दक्षिण कोरियामा कोरोना भाइरसको संक्रमण दिनानुदिन बढ्दै गएकाले यसबाट बच्न नेपालीहरू अझ बढी सजग र सचेत हुन जरुरी रहेको पनि विज्ञप्तिमा उल्लेख छ ।
कोरोना भाइरसको संक्रमणको शंका लागेमा अवैधानिक रूपमा कोरियामा रहेका विदेशीहरूसमेतले सार्वजनिक स्वास्थ्य संस्थाहरूमा गई चेकजाँच तथा उपचार गराउन र सोको क्रममा पक्राउ नगर्ने, स्वदेश नफर्काउने, तथा बिरामीको कानुनी हैसियत बारेमा नसोध्न अस्पतालहरूलाई निर्देशन दिइएको बताइएको छ । कोरियाको अध्यागमन विभागले नेपाली राजदूताबासलाई नै यस्तो पत्र लेखेर पठाएकाले सो सुविधाको फाइदा उठाउन पनि राजदूताबासले नेपालीहरूलाई आग्रह गरेको छ । विभिन्न सञ्चारमाध्यामले कोरियामा भने तिब्र गतिमा संक्रमितहरू फेला पर्न थालेको अवस्था जनाएका छन् । तसर्थ, कोरियाली सरकार र सम्बद्ध स्वास्थ्य निकायहरूले समय समयमा जारी गर्दै आएका सुरक्षाका उपायहरू प्रभावकारी ढंगले अवलम्बन गरी कोरोना भाइरसबाट सुरक्षित रहन राजदूताबासले नेपालीहरूमा आग्रह गरेको छ । त्यसो त कोरोना भाइरसबाट बच्नका लागि सिओल महानगरपालिकाको कार्यालयले पनि विभिन्न कार्यक्रम सञ्चालनमा ल्याइरहेकाले यसलाई अपनाउन पनि भनिएको छ ।
त्यसो त कोरोना भाइरसकै कारण दक्षिण कोरिया जाने तयारीमा रहेका नेपालीहरूको उडान सारिएको छ । यसैहप्ता दक्षिण कोरियामा जान तयार ५० जना नेपालीको उडान मिति सार्ने निर्णय गरिएको इपिएस कोरिया शाखाले जनाएको छ । शाखाका अनुसार उनीहरूको उडान मार्च तेस्रो सातापछि गरिने कार्यक्रम तय भएको छ ।
दक्षिण कोरियामा कोरोना भाइरसको संक्रमण फैलिएपछि सम्पूर्ण प्रक्रिया पूरा गरेर दक्षिण कोरिया जान तयार भएका नेपालीको उडान केही समयका लागि सारिएको हो । दक्षिण कोरियामा करिब ३५ हजार नेपाली कामदार छन् । हालसम्म दक्षिण कोरियामा ६ सय बढीमा कोरोना भाइरसको जीवाणु भेटिएको बताइए पनि संक्रमण फैलने क्रम जारी रहेका कारण यो संख्यामा वृद्धि हुन सक्ने अनुमान गरिएको छ । दक्षिण कोरियामा नेपालसहित विभिन्न मुलुकका आप्रवासी छन् । नेपालीमा अहिलसम्म संक्रमण भएको खबर नआएको बताइन्छ ।
कोरोना भाइरसबाट संक्रमितमध्ये धेरैजसो दक्षिण कोरियाको चौथो ठूलो सहर थेगुमा छन् ।
प्रकाशित मिति: सोमबार, फागुन १२, २०७६ ०५:३१
-1745656903.jpeg)