दोहा– कतारका लागि नेपाली राजदूत नारदनाथ भारद्वाजले वैदेशिक रोजगारमा रहेर आफूले सिकेका सीपलाई नेपालमा प्रयोगमा ल्याउन सके देश विकासमा टेवा पुग्ने बताएका छन् । मोरङ–सुनसरी सेवा समाज कतारले १५औँ स्थापना दिवस तथा साधारणसभामा बोल्दै राजदूत भारद्वाजले यस्तो बताएका हुन् ।
वेस्ट वेस्टर्न होटलमा भएको कार्यक्रममा कतारका नेपाली राजदूत भारद्वाजले कार्यक्रमको उद्घाटन गरेका थिए । २००१ मार्च २ गते स्थापना भएको मोरङ–सुनसरी समाज कतार ‘मोरङ सुनसरीको चाहना सभ्य र समृद्ध समाजको स्थापना’ भन्ने नारासहित कतारमा कार्यरत नेपालीहरूबीच आपसमा भाइचाराको सम्बन्ध विकास गर्न सक्रिय रहेको समाजले जनाएको छ ।
नेपाल र नेपालीको उन्नति तथा समृद्धिका लागि आवश्यक गतिविधिहरू सञ्चालन गर्न एक सक्षम् संस्थाको आवश्यकता महसुस गरी यो संस्थाको स्थापना भएको बताइन्छ ।
राजदूत भारद्वाजले मोरङ–सुनसरी जिल्लामा विकास निर्माणको काम मात्र होइन, नेपालको राजनीतिक जागरणको अगुवाइ गर्ने पनि भएकाले कतारबाट पनि त्यसमा सहयोग गर्नुपर्ने बताएका थिए । समाजको १५औँ साधारणसभाबाट सन् २०२०÷२१ को कार्यकालका लागि दिलिप पराजुलीको अध्यक्षतामा २३ जनाको कार्यसमिति चयन गरिएको छ ।
