काठमाडौं- रोजगारीका लागि मलेसिया पुगेका दुई जना नेपाली युवा त्यहाँको प्रहरी हिरासतमा रहेको बताइएको छ । मलेसियाको तमन मेलावती क्षेत्रमा रहेको एक पसलको झ्याल फुटाइदिएको आरोपमा प्रहरीले ती युवालाई पक्राउ गरी हिरासतमा राखेको हो ।
स्थानीय सञ्चारमाध्यम द स्टारका अनुसार सिसिटिभी फुटेज जाँच गर्दा दुई युवाले झ्यालको सिसा मुक्का हानेर फुटाएपछि भागेको देखिएको छ । मदिरा सेवन गरी मातेका दुई नेपाली युवाले मुक्का हानेर पसलको सिसा फोडेर भागेको पाइएपछि उनीहरूलाई हिरासतमा लिइएको मलेसियाको प्रहरीले जनाएको उल्लेख गरिएको छ ।
सञ्चारमाध्यमले घटनामा संलग्न २१ र २२ वर्षका दुई नेपाली युवालाई पक्राउ गरी प्रहरीले हिरासतमा राखेको उल्लेख गरे पनि उनीहरूको नेपालको ठेगाना र परिचय खुलाइएको छैन । प्रहरी हिरासतमा रहेका उनीहरू दुवै जना त्यही क्षेत्रको एक सपिङ मलमा सहायक कामदारको रूपमा काम गर्ने रहेको पाइएको बताइएको छ ।
