काठमाडौं - वैदेशिक रोजगारीको सिलसिलामा साउदी पुगेका नेपालीहरु चर्को जरिवानामा पर्ने गरेको देखिएको छ । रियादस्थित नेपाली दूतावासका अनुसार हालसम्म सम्पर्कमा आएका १७७ जना नेपाली श्रमिकले विभिन्न आरोपमा २९ करोड ५४ लाख ६० हजार रुपैयाँ जरिवाना तिनुपर्ने देखिएको हो ।
रोजगारीका क्रममा साउदी पुगेर विभिन्न प्रलोभनमा परी जरिवानामा पर्ने नेपाली श्रमिकहरुको संख्या उल्लेख्य रहेको दूतावासले जनाएको छ । यसरी जरिवानामा पर्नुको कारण काम गरिरहेको कम्पनी छोडेर भाग्नु, अवैधरुपमा सवारी चलाउनु, मदिरा कारोबार गर्नु, स्थानीय रुपमा मोबाइल सिमको गलत प्रयोग गर्नु, सामाजिक सञ्जालको गलत लाभ उठाउनुलगायत रहेको बताइएको छ ।
९० प्रतिशतभन्दा बढी श्रमिक धेरै कमाउने लोभमा काम गरिरहेको कम्पनी छोडेर भाग्ने गरेका कारण जरिवानामा पर्ने गरेको दूतावासले जनाएको छ । श्रमिकहरुलाई न्यूनतम दुई हजारदेखि तीन लाख रुपैयाँसम्म जरिवाना गरिएको छ । यद्यपि नेपालमा गरिएको सम्झौता अनुसारको काम नपाउने र धेरै कमाउने लोभमा आफू कार्यरत कम्पनी छाडेर भाग्दा रोजगारदाता कम्पनीले विभिन्न बहाना गर्दै श्रमिकमाथि जरिवाना लगाउँदै आएको बताइन्छ ।
यसरी कम्पनी छोडेर अन्यन्त्र गएका र अन्य कारणले जरिवानामा परेका श्रमिकहरुलाई सम्पर्कमा आएसम्म समन्वय र सहयोग गरिरहेको दूतावासले जनाएको छ । दूतावासकै पहलमा चालु आर्थिक वर्षको सुरुआतदेखि अहिलेसम्म २८९ जना नेपालीले साउदी अध्यागमनबाट ‘एक्जिट भिसा’ पाएर नेपाल फर्किने वातावरण बनेको दूतावासले उल्लेख गरेको छ ।
