काठमाडौं– वैदेशिक रोजगारीका लागि साउदी अरेबिया पुगी सप्लाइ कम्पनीमार्फत काम गर्ने नेपाली श्रमिक समस्यामा परेको बताइएको छ । साउदीमा सप्लाइ तथा कन्ट्र्याक्टिङ कम्पनीमार्फत काम गर्ने श्रमिकहरुले समयमै तलब भुक्तानी नपाउने, तोकिएको सेवासुविधा कटौती गर्ने र परिस्थितिवस स्वदेश फर्कनु परे ‘एक्जिट पर्मिट’ नदिनेलगायतका समस्या खेप्नुपरेको रियादस्थित नेपाली दूतावासले जनाएको छ ।
दूतावासले रोजगारीका लागि साउदी प्रस्थान गर्नुअघि आफू जाने कम्पनीको बारेमा राम्ररी जानकारी लिन नेपाली श्रमिकहरुलाई आग्रह गरेको छ । सप्लाइ कम्पनीमार्फत काम गर्ने श्रमिकहरु बढी समस्यामा परेको भन्दै दूतावासले यसतर्फ सचेत गराएको छ । दूतावासले श्रम सम्झौतामा उल्लेख भएका रोजगारदाता कम्पनीबारे उनीहरुको वेबसाइट वा अन्य स्रोतबाट पनि आवश्यक जानकारी लिन सकिने जनाएको छ ।
सप्लाइ तथा कन्ट्र्याक्टिङ कम्पनीमा काम गर्ने श्रमिकहरु समस्यामा परेको भन्दै दूतावासमा आउने संख्या उल्लेख्य रुपमा रहेको पनि दूतावासले जनाएको छ । श्रमका लागि आवश्यक जनशक्ति सप्लाइ गर्ने उद्देश्यले सञ्चालित अधिकांश कम्पनीहरु रिक्र्युटमेन्ट एजेन्सी, म्यानपावर सोलुसनजस्ता नाम राखेर श्रमसम्बन्धी कारोबार गर्नेे भएकाले बुझेरमात्रै वैदेशिक रोजगारको प्रक्रिया अघि बढाउन पनि दूतावासले सुझाव दिएको छ ।
यस्तै श्रमिकहरुलाई सप्लाइ कम्पनीमार्फत तहगतरुपमा सप्लाइ गरी रोजगारी दिने हुँदा त्यस्ता कम्पनीले दिने पारिश्रमिक तथा अतिरिक्त समयको सुविधासमेत न्यून हुने गरेको कारण समस्या आइरहेको पनि दूतावासले प्रस्ट पारेको छ । साउदीमा रहेका अधिकांश रोजगारदाता एजेन्सीमार्फत श्रमिक लिने कम्पनीहरुले एजेन्सीसँग गरेको सम्झौता सकिए वा भंग गर्दा समयमै भुक्तानी नहुँदा श्रमिकहरु शोषणमा पर्ने गरेको बताइन्छ ।
त्यतिमात्र नभई साउदीबाट करार अवधिभन्दा पहिल्यै पारिवारिक वा अन्य बाध्यताले काम छोडेर स्वदेश फर्किनुपर्ने अवस्था आए रोजगारदाता कम्पनीले श्रमिकहरुलाई अनिवार्यरूपमा ‘एक्जिट पर्मिट’ दिनुपर्ने व्यवस्था छ । तर, सप्लाइ कम्पनीमार्फत काम गर्ने नेपाली श्रमिकहरुले बाध्यात्मक अवस्थामा पुगे पनि समयमै एक्जिट पर्मिट नपाउँदा सास्ती खेप्नुपरेको दूतावासले उल्लेख गरेको छ ।
यस्तै केही दिनअघि साउदी भ्रमणमा रहेका राष्ट्रिय प्रजातन्त्र पार्टी (राप्रपा)का अध्यक्ष एवं पूर्वउपप्रधानमन्त्री राजेन्द्र लिङदेनले पनि साउदी अरबमा सप्लाइ कम्पनीमा नेपाली कामदार पठाउने कार्य बन्द गर्नुपर्ने बताएका छन् । पार्टीको भ्रातृ संगठन निर्माणका क्रममा साउदीमा रहेका नेपाली श्रमिकहरुसँगको अन्तरक्रियापश्चात् सप्लाइ कम्पनीमा काम गर्ने नेपालीहरुले दुःख पाइरहेको जानकारीमा आएको भन्दै लिङदेनले यसतर्फ सरकारको ध्यानाकर्षण गराउने बताए ।
उनले सप्लाइ कम्पनीमा काम गर्ने श्रमिक बढीजसो समस्यामा परेको देखिएकाले त्यस्ता कम्पनीहरुको विवरण संकलन गरी श्रम स्वीकृति नै दिन रोक्नुपर्ने भन्दै संसद् र सम्बन्धित निकायमा आवाज उठाउने प्रतिबद्धतासमेत व्यक्त गरे ।
०००००
-1752335779.jpg)
