काठमाडौं -इजरायलका लागि नेपाली राजदूत कान्ता रिजाल र इजरायलको जनसंख्या तथा अध्यागमन प्राधिकरण (पिआइबिए)का उच्च अधिकारीहरुबीच नेपाली कामदारहरुको समस्या समाधानका विषयमा छलफल भएको छ । जिटुजी (सरकार–सरकारबीच) सम्झौता अनुसार इजरायल पुगेका नेपाली सहायक कामदारहरुको भिसा नवीकरणलगायतका विषयमा देखिएको समस्या निराकरणका लागि छलफल भएको हो ।
हाल इजरायलमा जिटुजीमार्फत एक हजारभन्दा बढी नेपाली सहायक कामदार कार्यरत छन् । उनीहरुमध्ये झण्डै ८०० को संख्यामा भिसा नवीकरण भए पनि बाँकी रहेकाहरुको नवीकरण हुन नसक्दा समस्या देखिएको भन्दै समाधानका लागि दुई पक्षबीच छलफल गरिएको दूतावासले जनाएको छ । छलफलका क्रममा करिब २०० कामदारको भिसा नवीकरण हुन नसकेको विषयमा ध्यानाकर्षण गराइएको दूतावासका प्रथम सचिव एवं प्रवक्ता अर्जुन घिमिरेले बताए । उनका अनुसार इजरायली अधिकारीहरुले समस्यालाई गम्भीरतापूर्वक लिँदै भिसा नवीकरणलगायतका विषयमा कामदारहरुलाई कुनै समस्या हुन नदिने प्रतिबद्वता जनाएका छन् ।
यस्तै गैरआवासीय नेपाली संघ (एनआरएनए) इजरायलले पनि केही दिनअघि जिटुजीमार्फत इजरायल गएर विभिन्न समस्यामा परेका नेपालीका समस्या समाधानको माग गर्दै राजदूत रिजाल र नेपालका लागि इजरायली राजदूत हनान गोडरसँग छलफल गरेको छ । एनआरएनए इजरायलका अध्यक्ष कृष्णप्रसाद भण्डारीको नेतृत्वमा गएको टोलीले केयर गिभरको रूपमा काम गरिरहेका नेपाली श्रमिकले भोग्नुपरेका भिसा नवीकरण, समान श्रम अधिकारलगायतका विषयमा छलफल गरेको बताइएको छ ।
