काठमाडौं – वैदेशिक रोजगारीका लागि विभिन्न मुलुकमा पठाइदिने भन्दै ठगी गरेको आरोपमा प्रहरीले चार जनालाई पक्राउ गरेको छ । क्रोएसिया, नेदरल्याण्ड, क्यानडा र कुवेतमा आकर्षक तलबसहितको रोजगारी लगाइदिने भन्दै विभिन्न व्यक्तिसँग रकम संकलन गरी फरार रहेको आरोपमा प्रहरीले उनीहरुलाई पक्राउ गरेको हो ।
पक्राउ पर्नेमा रामेछापको उमाकुण्ड गाउँपालिका घर भई काठमाडौं गोठाटार बस्ने ३५ वर्षीया शर्मिला सुनुवार, कास्कीको पोखरा महानगरपालिका–११ घर भई ललितपुर नख्खिपोट बस्ने ४० वर्षीया तारा गुरुङ, नवलपरासीको देवचुली नगरपालिका घर भई काठमाडौं टोखा बस्ने ३० वर्षीय समिर आले मगर र सल्यानको कपुरकोट गाउँपालिका घर भई भक्तपुर सुर्यविनायक बस्ने ५१ वर्षीय जगतबहादुर खड्का रहेका छन् ।
सुनुवारले लक्ष्मण हमाललाई क्रोएसियामा फुड प्याकिङको काममा एक लाख बढी तलब हुने प्रलोभन देखाई पटक–पटक गरी दुई लाख रुपैयाँ लिएर ठगी गरेको प्रहरीले जनाएको छ । त्यस्तै गुरुङले नेदरल्याण्डमा सुपरमार्केटको काममा एक लाख बढी तलब हुने प्रलोभन देखाई रविन चौधरीसँग पटक–पटक गरी तीन लाख ४५ हजार रुपैयाँ लिएर फरार भएको अवस्थामा पक्राउ गरेको प्रहरीले जनाएको छ ।
यसैगरी मगरले क्यानडामा प्रतिष्ठित मार्केटमा दुई लाखभन्दा बढी तलब हुने विश्वास दिलाई महेश पौडेलसहित दुई जनासँग पटक–पटक गरी पाँच लाख ४५ हजार रुपैयाँ लिएर ठगी गरेको प्रहरीले उल्लेख गरेको छ । त्यसैगरी खड्काले कुवेतमा बाइक राइडरको काम लगाइदिने भन्दै ५० हजार रुपैयाँभन्दा बढी तलब हुने प्रलोभन देखाई दीलिप विष्टसँग पटक–पटक गरी एक लाख ९४ हजार रुपैयाँ लिएर ठगी गरेको प्रहरीले जनाएको छ ।
पक्राउ परेका चार जनालाई नै काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको बताइएको छ । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनलाई थप अनुसन्धान तथा कारबाहीको लागि विभागमा बुझाइएको प्रहरी उपरीक्षक मिलन केसीले जानकारी दिए ।
-1752335779.jpg)
