काठमाडौं– वैदेशिक रोजगार व्यवसायीहरुले पछिल्लो समय साउदी अरेबियामा नेपाली श्रमिक पठाउँदा देखिएको समस्या समाधानबारे वैदेशिक रोजगार विभागका महानिर्देशक मदन दाहालसँग छलफल गरेका छन् । नेपाल वैदेशिक रोजगार व्यवसायी संघका अध्यक्ष राजेन्द्र भण्डारीको नेतृत्वमा गएको व्यवसायीहरुको टोलीले आइतबार विभागका महानिर्देशक दाहालसँग भेट गरी साउदीमा नेपाली श्रमिकले खेप्नुपरेको समस्या, मागपत्र प्रमाणीकरणमा हुने ढिलाइलगायतका विषयमा छलफल गरेको हो ।
रोजगारीका लागि साउदी जाने नेपाली श्रमिकहरुले सम्झौताअनुसार समयमै सेवासुविधा, तलब नपाउने समस्या भइरहेकोप्रति सरकारले नै पहल गरिदिनुपर्ने आवश्यकता देखिएको भन्दै ध्यानाकर्षण गराउन महानिर्देशक दाहलसँग छलफल गरिएको संघका महासचिव मेघनाथ भुर्तेलले बताए ।
उनका अनुसार साउदीमा श्रमिक पठाउने क्रममा व्यवसायीबीच हुने अस्वस्थ प्रतिस्पर्धा र मागपत्र प्रमाणीकरणमा देखिएको समस्या निराकरणका लागि पनि छलफल भएको छ । ‘विशेषतः श्रमिक पठाउँदा हुने समस्या समाधानको सवाल नै छलफलको विषय हो,’ महासचिव भुर्तेलले भने, ‘पहिलो सर्त भनेकै साउदी जाने श्रमिकको काम, कम्पनी, तलब र सुरक्षाको ग्यारेन्टी हुनुपर्छ, यसमा केही समस्या देखिएको हुँदा समाधानका लागि विभागसँग आग्रह गरेका छौं ।’
छलफलका क्रममा महानिर्देशक दाहालले साउदीमा श्रमिक पठाउँदा देखिएका समस्या, व्यवसायीबीच हुने अस्वस्थ प्रतिस्पर्धा र मागपत्र प्रमाणीकरणमा हुने ढिलाइ अन्त्यका लागि विभागबाट सक्दो पहल गर्ने प्रतिबद्धता जनाएको महासचिव भुर्तेलले जानकारी दिए ।
यसअघि पनि साउदीमा नेपाली श्रमिक पठाउँदा विभिन्न समस्या देखापरे पनि समय–समयमा हुने छलफल र अन्तरक्रियाबाट समाधान हुँदै आएको उनले बताए । यद्यपि, साउदीमा कार्यरत नेपाली श्रमिकको बहिर्गमन भिसा, श्रम नवीकरण, तलब भुक्तानी तथा रोजगारीका क्रममा मृत्यु भएका व्यक्तिको शव व्यवस्थापनलगायतका सम्बन्धमा अझै पनि सास्ती खेप्नुपरेको बताइएको छ ।
