काठमाडौं– चालु आर्थिक वर्ष २०८०/८१ को पहिलो महिना अर्थात् साउनमा वैदेशिक रोजगारीका लागि साढे ५५ हजारभन्दा बढी नेपाली श्रमिक विदेशिएका छन् । वैदेशिक रोजगार विभागले सार्वजनिक गरेको विवरणअनुसार साउन महिनामा ५५ हजार ५७५ जना नेपाली नयाँ तथा पुनः श्रम स्वीकृति लिएर रोजगारीका लागि विभिन्न मुलुकमा गएका हुन् । विभागको तथ्यांकअनुसार साउनमा विदेशिने नेपालीहरुको संख्या गत आवको अन्तिम महिना असारको भन्दा केही वृद्धि भएको छ । असारमा ५५ हजार २९९ जनाले वैदेशिक रोजगारीका लागि श्रम स्वीकृति लिएका थिए ।
गत आवको अन्तिमसम्म पहिलो स्थानमा रहेको मलेसियालाई उछिन्दै चालु आवको सुरुआती महिनामा संयुक्त अरब इमिरेट्स (युएई)ले पहिलो स्थान ओगटेको छ । विभागको तथ्यांकअनुसार युएईका लागि ११ हजार ८७८ जनाले श्रम स्वीकृति लिएका छन् । गत असारमा युएई जान ११ हजार १५५ जनाले श्रम स्वीकृति लिएका थिए । यस्तै साउन महिनामा रोजगारीका लागि कतार जान १० हजार ५६१ जनाले श्रम स्वीकृति लिएका छन् । संख्याको हिसावमा कतार दोस्रो स्थानमा परेको छ ।
- कुन देशमा कति
- युएई– ११,८७८
- कतार– १०,५६१
- साउदी– १०,०३०
- मलेसिया– ९,२६८
- कुवेत– ३७१७
- कोरिया– २४१४
- क्रोएसिया– १६४९
- जापान– ८२७
- रोमानिया– ६७३
- माल्टा– ६७१
त्यसैगरी श्रम स्वीकृति लिएर साउदी अरेबियामा १० हजार ३० जना श्रमिक रोजगारीका लागि पुगेको विभागले उल्लेख गरेको छ । साउदी जान गत असारमा आठ हजार २८ जनाले श्रम स्वीकृति लिएका थिए ।
यस्तै नेपाली श्रमिकहरुको रोजगारीका लागि गत आर्थिक वर्षको सुरुआतदेखि नै पहिलो गन्तव्य बनेको मलेसिया चालु आवको पहिलो महिनामा चौथो स्थानमा झरेको छ । मलेसिया जाने नेपाली श्रमिकहरुको संख्या केही महिनादेखि क्रमशः घट्दै गएको देखिएको विभागको तथ्यांकले देखाएको छ । मलेसिया जान गत असारमा ११ हजार ८१६ जनाले श्रम स्वीकृति लिए पनि साउनमा यो संख्या नौ हजार २६८ मात्रै रहेको छ ।
यस्तै कुवेतका लागि तीन हजार ७१७ जना रोजगारीका लागि पुगेका छन् । उल्लिखित पाँच मुलुकले नै नेपालको वैदेशिक रोजगारीको ठूलो हिस्सा (झण्डै ८० प्रतिशत बढी) ओगटेको देखिन्छ ।
यसैगरी क्रोएसियामा एक हजार ६४९, जापानमा ८२७, रोमानियामा ६७३, माल्टामा ६७१, माल्दिभ्समा ५७०, साइप्रसमा ४८७, बहराइनमा ४७५, पोल्याण्ड ४६२, ओमानमा ३१९ जनाले रोजगारीमा जानका लागि श्रम स्वीकृति लिएका छन् । त्यस्तै इपिएस प्रणालीबाट दक्षिण कोरिया जाने नेपालीको संख्या २ हजार ४१४ रहेको छ । विभागबाट कूल श्रम स्वीकृति लिनेमध्ये पुनः श्रम स्वीकृति लिने १६ हजार ४२३ जना छन् भने पहिलोपटक विदेश जान श्रम स्वीकृति लिनेको संख्या ३९ हजार १५२ जना रहेका छन् । चालु आवको पहिलो महिनामा श्रम स्वीकृति लिनेमध्ये सात हजार ७२५ जना महिला श्रमिक रहेको विभागले उल्लेख गरेको छ ।
यस्तै विभागको तथ्यांकअनुसार जिल्लागतरुपमा झापाबाट सबैभन्दा बढी रोजगारीका लागि श्रम स्वीकृति लिएको देखिन्छ । साउनमा झापाबाट दुई हजार ६६७ जना विदेशिएका छन् । गत आर्थिक वर्षभरि पहिलो रहेको धनुषा दोस्रो स्थानमा झरेको छ । यहँबाट २ हजार ६३० जना श्रमिक विदेशिएका छन् । यस्तै तेस्रो स्थानमा मोरङबाट दुई हजार २३३ जना रोजगारीका लागि बाहिरिएका छन् । चौथोमा रहेको सिरहाबाट दुई हजार १८२ र पाँचौंमा रहेको महोत्तरीबाट एक हजार ९७७ जना रहेका छन् । त्यसैगरी रुपन्देही, सुनसरी, सर्लाही, सप्तरी, चितवन, दाङ, कपिलवस्तु, मकवानपुर, रौतहट, तनहुँ, स्याङ्जा, बारा, धादिङ र नवलपरासी पूर्वबाट पनि वैदेशिक रोजगारीका लागि जाने नेपालीहरुको संख्या ठूलो रहेको विभागको तथ्यांकले देखाएको छ ।
