काठमाडौं- सरकारले वैदेशिक रोजगारीमा गएका ११२ श्रमिकका परिवारका सदस्यलाई स्वास्थ्य उपचार खर्च उपलब्ध गराएको छ । वैदेशिक रोजगार बोर्डको सचिवालयले गत आर्थिक वर्ष २०७९/८० मा गम्भीर बिरामी परेका रोजगारीका लागि विदेश गएका श्रमिकका परिवारका सदस्यलाई ५६ लाख रुपैयाँ स्वास्थ्य उपचार खर्च उपलब्ध गराएको हो ।
बोर्डले बिरामीको अवस्था हेरी वैदेशिक रोजगारीमा गएका श्रमिकका परिवारका सदस्यलाई स्वास्थ्य उपचारका लागि ५० हजार रुपैयाँसम्म आर्थिक सहायता प्रदान गर्ने गर्छ । ‘कामदारका परिवारको स्वास्थ्य उपचारसम्बन्धी मापदण्ड, २०७३’ अनुसार स्वास्थ्योपचार खर्च उपलब्ध गराउँदै आएको बोर्डका निर्देशक एवं सूचना अधिकारी राजन पौडेलले बताए । उनका अनुसार श्रमिकका परिवारको बिरामी सदस्यलाई तत्काल शल्यक्रिया गर्नु नपर्ने अवस्थामा १५ हजारसम्म, सामान्य शल्यक्रिया गर्नुपर्ने अवस्थामा ३० हजार र शल्यक्रियासहित औषधि सेवन गर्नुपर्ने अवस्थामा ५० हजार रुपैयाँ उपलब्ध गराउने व्यवस्था छ ।
उपचार खर्च दाबी गर्न मापदण्डअनुसार आवश्यक कागजातसहित बिरामीको रोग खुल्नेगरी सरकारी अस्पताल वा मान्यताप्राप्त चिकित्सकको ‘प्रेस्किप्सन’ वा सिफारिसपत्र पेस गर्नुपर्ने बोर्डले जनाएको छ । सहायता क्यान्सर, मिर्गौला प्रत्यारोपण, मुटुको शल्यक्रिया, पार्किन्सन्स र अल्जाइमरजस्ता गम्भीर प्रकृतिको बिरामीले मात्रै यो सुविधा पाउने बताइएको छ ।
वैदेशिक रोजगारीमा गएको श्रमिकले पालनपोषणको जिम्मेवारी लिएको पतिपत्नी, छोराछोरी, आमाबुबा तथा महिला श्रमिकको हकमा सासू ससुरालेसमेत स्वास्थ्योपचारमा आर्थिक सहायताका लागि बोर्डसमक्ष निवेदन दिन पाउने व्यवस्था छ ।
